Sa Marmidda no at a devènnere una zona industriale de s’energia. Cun sa sentèntzia n. 51 de su 20 de ghennàrgiu 2026, su Tribunale Amministrativu Regionale de sa Sardigna at denegadu su recursu de sa sotziedade Grv Wind Sardigna 7 s.r.l., cunfirmende sa balidesa de su pàrrere negativu de Valutatzione de Impatu Ambientale (BIA) espressadu dae su Ministèriu de s’Ambiente pro su progetu eòlicu “Su Murdegu”.
Su progetu previdiat su collocamentu de sete aerogeneradores, cun una potèntzia cumplessiva de 42 MW, in prus cavos, caminos de servìtziu e àteras òperas, in su coro de sa Marmidda, intre is comunos de Biddanoa Franca, Furtei, Bidda Mara e Seddori. Un’àrea de grandu valore istòricu, paisagìsticu e archeològicu, a pagu tretu dae su Nuraxi de Barùmini, patrimòniu de s’umanidade UNESCO, e de su nuraghe Genna Maria.
Su progetu “Su Murdegu” dd’aiant giai declaradu incumpatìbile cun s’ambiente in su 2025, segundu is pàrreres negativos de sa Cummissione Tècnica PNRR-PNIEC e de sa Subrintendèntzia ispetziale de su Ministèriu de sa Cultura. Cun su decretu diretoriale n. 190 de su 9 abrile 2025, su Ministèriu de s’Ambiente aiat decretadu chi s’impiantu nos si podiat fraigare, essende incumpatìbile cun su cuntestu archeològicu millenàriu.
Sa sotziedade chi at propostu su progetu at impugnadu su providimentu e pedende fintzas dinari pro is dannos pro is ritardos. Ma su TAR at naradu ca nono a totu is rechestas. Is giùighes amministrativos ant donadu resone a su dinnegu ministeriale, ponende a notu unas cantas crititzidades graves:
Ausèntzia de sa Valutatzione de Pesu Ambientale (VIncA), mancaiat difatis sa Relatzione de Pesu Ambientale, indispensàbile pro valutare is efetos in is giassos de sa Rete Natura 2000, comente sa ZSC “Monte San Mauro”.
Arriscu pro su patrimòniu archeològicu: si previdiat difatis su collocamentu unas cantas turbinas a unos 150–200 metros dae is nuraghes Perdu Atzeni e Mutziori, cun su perìgulu sèriu chi una pala, istachende·si a malasciagura, potzat causare dannos.
Degollu paesagìsticu: s’artària de is turres eòlicas diat àere isvistadu sena rimèdiu paisàgios istòricos e agrìculos tra is prus identitàrios de sa Sardigna.
Unu passàgiu de sa sentèntzia at a fàghere giurisprudèntzia in matèria. Su TAR at acraridu ca s’amministratzione no est obrigada a modificare unu progetu cando presentat problemas graves o incumpatìbiles cun is tutelas ambientales e paisagìsticas, ma podet nàrrere nono in manera legìtima.
In prus su TAR at denegadu sa recherta de rifata econòmica presentada dae sotziedade pro is ritardos dèpidos a is ricursos. Perunu indennizu, duncas, a càrrigu de su Ministèriu: s’amparu de su patrimòniu ambientale e culturale benit primu de is interessos econòmicos privados.
Foto: BARUMINI : Su Nuraxi – Casa Zapata – Centro Giovanni Lilliu
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
