Sas eletziones tenent su clima issoro, cun nues de cuntierra e termòmetru marchende temperaduras artas. Ma su clima in sos programmas non cuntentat sos de Fridays for Future Sardigna.
A bisu issoro su peus de issos est Paolo Truzzu cun nemmancu unu de sos ùndighi critèrios indicados in su report chi «otenet una valutatzione positiva». Unu pagu mègius de issu Lucia Chessa «pro sa contrariedade a sa dorsale de su metanu e pro su reconnoschimentu de sa netzessidade de menguare s’impreu de fòssile e de emissiones zootècnicas». Ma nudda b’at in contu de «essida dae su carbone, Saras, aumentu de sas rinnovàbiles, gherra a sa sicàngia, decarbonizatzione de sos trasportos, torrada de sas àreas militares». De Sardegna R-Esiste «petzi su 22% de su programma est in lìnia cun sas punnas netzessàrias de transitzione ecològica».
Sa classìfica la ghiant ex aequo Alessandra Todde e Renato Soru, ma ambos si firmant a su 31%.
«De su tzentru manca ghiadu dae Pd e 5 Isteddos nos agradant sos puntos in contu de cuntrastu a su consumu de sa terra e de gherra a sa sitzidade, bona sa voluntade de fàghere una sotziedade energètica sarda, de intzentivare sas comunidades energèticas e de eletrificare sas flotas de trasportu pùblicu. Negativu meda, imbetzes su “eja” a sa metanizatzione, su de non mentovare sa serrada de sa Saras e s’idea de sas bases militares “sustenìbiles”».
«Sun graes sas ausèntzias» fintzas in su programma de Soru. «Nudda in su de sa Coalitzione sarda chi inditet una positzione crara in contu de metanu, Saras e carbone. Bene sa costitutzione de una Diretzione regionale de s’energia gasi comente s’agiudu a sas comunidades energèticas e s’impignu diretu de sa Regione in su fràigu de impiantos rinnovàbiles mannos. Positivas sas lìnias ferroviàrias elètricas e su trasportu pùblicu a cramada ma male sa rimodulatzione de sos obietivos in contu de rinnovàbiles». Perplessidades finamentas pro su chi pertocat su carbon credit e sas bases militares. «Pro sas primas b’at perìgulu de green-washing; pro sas segundas bene su referendum ma impignos prus chi non vagos».
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
