Su sardu est un’iscusòrgiu de su tempus coladu o su còdighe de su tempus benidore de sa terra nostra? Dae s’isportellu linguìsticu de s’Unione de sos Comunes de su Monte Arvu narant chi emmo a ambas duas sas cosas. E pro lu pòdere nàrrere ant fatu unu manualeddu pro sas famìlias.
Publicadu in ocasione de sa Die internatzionale de sa limba materna, chi dae su 1999 ruet cada 21 de freàrgiu, su pdf “Su sardu in domo, su sardu in totue” punnat a ingendrare unu protzessu re-apropiativu pro mèdiu de unas cantas metodologias praticàbiles pròpiu in intro de sas domos.
Sos meledos de sos operadores Angelo Canu e Mauro Piredda, ativos cada mangianu dae su lunis a sa chenàbura in s’istrutura thiniscolesa (cabu-filera de unu progetu chi interessat fintzas sas biddas de Bitzi, Lodè, Luvula, Onanie, Orune, Osidde, Pasada e Torpè), naschent dae sos versos de unu sonetu nòdidu de tziu Remundu Piras de su 1977:
Sa limba de babbos e de jajos nostros
no l’usades pius nemmancu in domo…
Bene. Male, antzis. Ca b’at coladu belle 50 annos dae tando e su sardu in sas domos lu faeddat semper prus paga gente. Duncas no lu trasmitent.
Est pro custu chi bi diat pòdere àere sa possibilidade de intervènnere impreende tres modellos de atzione bene connotos peri su mundu (e chi, difatis, tenent sos nùmenes in inglesu): dae su prus tèteru “Minority language at home” (praticàbile si ambos sos genitores sunt sardòfonos) a sos prus flessìbiles “One parent one language” (unu genitore chi faeddat a su pitzinnu cun una limba e unu cun s’àtera) e “Time and place” (in ue s’impreu de su sardu est ligadu a logos e momentos ispetzìficos de sa die comente sa chena, su giogu o àteras situatziones).
S’Ufìtziu non si lìmitat a sa distributzione de su manuale (chi si podet fintzas iscarrigare dae su situ de s’Unione de sos Comunes), ma oferit unu suportu ativu pro mèdiu de consulèntzias personalizadas, cursos de alfabetizatzione pro mannos e laboratòrios pro minores.
Sos operadores sunt a disponimentu in sos ufìtzios de carrera de Isalle, in Thiniscole, pro orientare sas famìlias conca a sa metodologia sa prus adata. Pro prenotare un’apuntamentu est possìbile a fàghere su nùmeru 0784 878648 (internu 5) o a iscrìere una mail a cultura.unionemontalbo@gmail.com.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
