Trintatres annos. No est petzi unu nùmeru, est su tempus de una vida intrea colada in intro ma cun sa beste de un’òmine innotzente. S’acontèssida de Beniamino Zuncheddu, vìtima de su prus longu errore giuditziàriu de s’istòria republicana, est su sìmbulu de sa fragilidade de s’ordinamentu nostru.
De custu abissu naschet sa proposta de lege de initziativa populare promòvida dae su Partidu Radicale e como fata pròpia dae Forza Italia, chi punnat a introduire una provisionale pro sas vìtimas de errores giuditziàrios. Oe, chie est vìtima de un’errore giuditziàriu devet gherrare contra a un’iter burocràticu e legale prus chi non grae in antis de bìdere reconnotu su diritu a sa rifata.
Una bia otènnida sa revisione de su protzessu e s’assolutzione, est capatze chi colent annos meda in antis chi s’Istadu èroghet sos fundos. In custu limbu, s’innotzente — chi in su mentres podet àere pèrdidu traballu, afetos e propiedades — est lìberu, ma privu de mèdios pro torrare a comintzare.
Sa “Lege Zuncheddu” previdet s’erogatzione lestra de una summa a tìtulu de acontu (sa provisionale) comente sa sentèntzia de revisione est definitiva. Custu cheret nàrrere chi cando s’istadu si faddit tenet su dovere de èssere parte de sa rinàschida esistentziale de sa vìtima.
In custa ùrtima chida de campagna referendària, cun invitos a lògicas clientelares, umbras chi pertocant sutasegretàrios e atacos rugrados a sa magistradura, sa Lege Zuncheddu si presentat comente una de sas pagas cosas de mèritu autènticu. Cando chi sa dibata si perdet in islogan, custa norma iscudet sa mirada sua addae de su 22 e de su 23 de martzu: non punnat a torrare a disegnare sos poderios, ma acontzat su fallimentu prus grave de s’Istadu. Su de torrare sa dignidade a lestru a sos innotzentes est a beru una riforma chi subravivet a sas urnas e a sas cuntierras.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
