Unu passu innantis conca a s’ativatzioni de sa prima Terapia intensiva pediàtrica in Sardigna. Ddu previdit una cunventzioni intra s’ospidali Brotzu de Casteddu e s’ ospidali pediàtricu Bambin Gesù de Roma, centru de eccellèntzia de chirca pediàtrica in Europa. S’acòrdiu sinnat su cumentzu de una collaboratzioni pensada po aberri s’unidadi operativa in Casteddu aintru de ocannu.
A sa firma ddoe fìant, po su Brotzu, su diretori generali Maurizio Marcias, su diretori sanitàriu Giorgio Carboni e su diretori de s’Anestesia pediàtrica Alberto Lai. Po su Bambin Gesù ant pigau parti su presidenti Tiziano Onesti e su diretori sanitàriu Massimiliano Raponi.
S’obietivu de s’acòrdiu est afortiai sa chirca scentìfica e sa formatzioni spetzialìstica in su campu pediàtricu e de arta cumplessidadi. Sa Terapia intensiva noa e semi-intensiva pediàtrica, sa prima in Sardigna, at a permiti de gestiri in s’Ìsula is casus prus cumplicaaus, cichendi de fait calai is trasferimentus a foras de sa regioni e mejorai sa lestresa de is interventus.
“Su de fai sa Terapia intensiva pediàtrica rapresentat unu arresurtau stratègicu po su sistema sanitàriu regionali”, narat sa presidenti de sa Regioni e assessora a interim de sa Sanidadi, Alessandra Todde. “Est un’obietivu chi eus sighiu cun determinatzioni po garantiri a is pipius e a is famìlias sardas curas adatas sena de depi afrontai biàgius cumplicaus e s’ispissu arriscosus andendi in atras regionis. Custu acòrdiu testimòngiat sa voluntadi nosta de investiri in cumpetèntzias, calidadi e collaboratzioni cun is mellus eccellèntzias natzionalis”.
Est puru prevìdia sa creatzioni de unu calendàriu de atividades formativas e de scàmbiu professionali. Gràtzias a custu anestesistas-rianimadoris e personali infermierìsticu de su Brotzu ant a podi fai formatzioni spetzialìstica in su Bambin Gesù po imparai cumpetèntzias avantzadas in sa gestioni de is malaidus. A su matessi tempus, su centru de eccellèntzia romanu at a garantiri no sceti s’agiudu formativu ma fintzas un’afiancamentu diretu in Casteddu: unu grupu de mèdicus e infermierìs at a essi difatis presenti po s’abertura de s’unidadi noa, asseigurendi standard artus de seguresa e calidadi assistentziali.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
