Unu biàgiu in sa memòria, tra istòrias, contos, sonos de unu passadu galu biu: custu est su coro de su cunvegnu “Radici – Sa die de sos disterrados – Raichinas a cumone“, s’eventu culturale in programma su 24 de abrile in Pasada organizadu dae s’assòtziu culturale Parte ‘e Sole e promòvidu dae s’Unione de is Comunos de su Montarvu e dae su Comunu de Pasada.
S’initziativa faghet parte de su progetu “Turismo delle Radici“, sustentu dae su Ministeru de sa Cultura, dae su de is Afares Èsteros e de sa Cooperatzione Internatzionale, in intro de ITALEA – Il viaggio verso le tue radici, e cofinantziadu dae s’Unione Europea pro mèdiu de su programma Next Generation EU. In prus, su progetu est patrotzinadu dae sa FASI, sa Federatzione Assòtzios Sardos in Itàlia.
“Bolimus propònnere unu momentu de meledu in contu de una chistione istòrica chi at cambiadu sa sotziedade sarda”, at naradu Giuseppe Sale, fundadore e presidente de Parte ‘e Sole. Si tratat de su fenòmenu migratòriu chi, intre su 1950 e su 1970, at interessadu sa de tres partes de sa populatzione sarda chi lassadu sa Sardigna pro chircare traballu in terra agena, in su Nord Itàlia o in s’èsteru. Una tucada epocale chi, mancari non siat coladu tempus meda, arriscat de èssere ismentigada.
Gràtzias a unos cantos interventos e testimonias, s’eventu bolet aprofundire s’impatu sotziale e culturale de cussa migratzione, chi at batidu pastores e massajos sardos, a si cunfrontare cun gente, limbas, culturas, traballos e logos noos.
Printzipiende dae is 9.30 de mangianu, acumpàngiant su pùblicu in custu biàgiu in sa memòria, Vinicio Busacchi, filòsofu, cun un’interventu a tìtulu “L’identità che non si perde”; Angelo Canu, antropòlogu, chi at a chistionare de “Antropologia dell’emigrazione: sensi, memoria e linguaggio nella costruzione dell’identità”; s’istòricu Italo Deledda, cun una relata in contu de “passàgiu dae su sartu a sa tzitade”; Ciriaco Offeddu, iscritore nugoresu candidadu a su Premio Strega, cun una riflessione in contu de “orìgine de su fenòmenu migratòriu”.
In programma fintzas testimonias diretas de emigrados sardos, comente sa de Paolo Atzori, presidente de is Tzìrculos Sardos in Germània (Istocarda), in videocunferèntzia, e Giovanni Decandia, boghe istòrica de is emigrados sardos in Europa e diretore de “Il Messaggero Sardo“.
A merie, s’eventu si tràmudat in su tzentru istòricu de Pasada, in su Ceas “Casa delle Dame”, in ue s’etnomusicòlogu Bustianu Pilosu presentat “Una valigia di suoni”, dedicada a is atopos musicales de is sardos in su disterru, cun sa partetzipatzione de Bastianino Mossa, presidente de sa F.A.S.I., e unu rapresentante de ITALEA Sardegna, pro allegare de su “Turismu de is Raighinas”.
Serrant su programma su Tenore Su Cussertu torpinu, su Mini Folk de sa Pro Loco de Pasada, e is poesias binchidoras de su Prèmiu de Poesia Sarda, cun s’inauguratzione de sa mustra fotogràfica “Sudore all’estero” e su vìdeu “In terra anzena”, de is istudiantes de s’Istitutu Cumprensivu de Pasada.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
