Sa Rete Sarda pro sa Defensa de sa Sanidade Pùblica, assòtziu chi s’òcupat de amparare sa sanidade pùblica in Sardigna, at manifestadu sa contrariedade sua pro su gasi naradu Decretu Schillaci chi diat pòdere donare “su corpu de gràtzia” a sa meighina generale e a s’assistèntzia sanitària territoriale in Sardigna.
Segundu custu grupu, su decretu diat pòdere pònnere in dificultade is mèigos de famìlia e is pediatras de base. S’idea de su decretu est chi custos mèigos depant colare unas cantas oras a traballare in is Domos de Comunidade (Case di Comunità), is tzentros sanitàrios noos nàschidas unos binti annos a oe e disciplinadas dae su DM77 de su 2022.
Sa Rete Sarda timet ca, si is mèigos ant a dèpere traballare semper de prus in custos tzentros, ddoe ant a èssere prus pagu mèdicos in is biddas e in is ambulatòrios rionales. Custu diat pòdere rèndere prus pistighingiosu pro is persones agatare unu dotore a curtzu a domo.
Su grupu rivèndicat fintzas ca sa sanidade diat dèpere èssere prus serente a sa gente, mescamente in is comunos piticos de is zonas internas de sa Sardigna e a largu de is tzitades mannas, e no a s’imbesse. A pàrrere issoro, iscostiare is mèigos dae is sedes abituales issoro diat pòdere creare confusione e prus che totu at a èssere prus difìtzile a si curare.
Sa Rete Sarda at paragonadu custu cambiamentu a àteras riorganizatziones fatas in passadu in is ispidales, narende chi unos cantos sèberos ant giutu a sa serrada o s’impiticamentu de diversos servìtzios sanitàrios.
Un’àteru pensamentu pertocat su dinari e is progetos de su PNRR: segundu su grupu is investimentos in programma interessant prus che totu is infrastruturas e is tecnologias noas, ma non tenent contu de sa mancàntzia mèdicos e infermieris.
Sa presidenta de sa Rete Sarda, Claudia Zuncheddu, at naradu ca sa sanidade pùblica arriscat de s’indebilitare semper de prus e ca is mèigos de famìlia sunt importantes meda pro more ca sighint is persones cada die.
In fines, sa Rete Sarda avertet chi cun su modellu organizativu nou at a aumentare sa burocratzia e is mèigos ant a tènnere prus pagu tempus pro is malàidos, e pro custu diant pòdere andare de prus a su prontu sucursu o, peus ancora, ant a fàghere ricursu a sa sanidade privada.
Sa Rete Sarda proponet duncas una revisione de is Domos de Comunidade, pedende una riorganizatziones issoro tenende contu de s’atuale crisi sanitària e de is bisòngios beros de is territòrios.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
