Su 28 de làmpadas, in collaboratzione cun s’Assòtziu Turìsticu Proloco de Lanusè, at a èssere projetadu pro sa primu borta in pùblicu, in su Cineteatro Tonio Dei, su docufilm de Andrea Loddo “Radici di Bronzo: La terra dei Sardi”, in ocasione de sa de 39 editziones de sa Sagra de sa Cariasa de Lanusè. S’intrada at a èssere a indonu e aberta a totus.
Loddo, archeo-isperimentadore e artista ogiastrinu, faghet s’esòrdiu suo in su tzìnema cun custu film documentàriu chi allegat de s’època de oro de sa Sardigna, s’edade nuraghesa. Ambientadu in su 1274 a.C., perìodu chi torrat cun sa Batàllia de Qadesh, sa pellìcula contat sos fatos de su Prìntzipe Dan, connotu comente su “Gherreri ispadatzinu coratzadu de Uda”. A pustis de s’èssere acordadu comente serbidore de su Faraone Ramses II, Dan contòniat a Sardigna cun sos cumpàngios suos. Sa narratzione s’isvilupat a fùrriu de sa sutzessione a sa ghia de su bidditzolu, contende sa vida culturale e ispirituale de sa comunidade nuraghesa.
S’artista de Lanusè in su film at rapresentadu in manera fidele sas artes e sos traballos de s’època, interessende artesanos espertos e impreende costùmenes frutu de annos de archeologia isperimentale. Sa punna sua est de fàghere abèrrere sos ogros a sa gente in contu de su ricu patrimòniu istòricu e archeològicu de sa Sardigna, descrita comente “sa terra prus archeològica de su mundu”. Pro mèdiu de una narratzione afrantzadora e realìstica, su film contat a pilu e sinnu sa vida fitiana de sa Tziviltade Nuràgica.
Sa cumpangia de atores est formada dae prus de setanta personàgios, ispirados a sos brunzetos nuraghesos e a su folclore locale. Intre sos protagonistas ddoe est, Angelo Ghiani, chi intèrpretat su Prìntzipe Dan, posca Piero Girau, chi faghet su babbu Capu Tribù de Uda, Andrea Loddo, chi est su Gherreri Ispadatzinu de Pàdria, Roberto Schirru, su Gherreri Artzieri de Useddus, e Gerolamo G. Barabino su Gherreri Artzieri de Teti.
Nàschidu in Casteddu in su 1976, Loddo at dedicadu sa vida sua a chircare su modu chi is nuraghesos traballaiant su brunzu. Cun “Radici di Bronzo”, faghet s’esòrdiu suo comente regista, punnende a fàghere connòschere de prus s’istòria antiga de sa Sardigna. Su film est istadu giradu in unas cantos logos ammajadores de sa Sardigna e tenet ricostrutziones 3D de su Nuraghe Genna de Maria de Biddanoa Forru e de sa Tumba de sos Mannos de Lanusè.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
