S’est concruidu cun una resessida manna su giru de presentadas de su giornaleddu “Shardana – Bronzo e Sangue”, sa graphic novel fantasy, publicada dae Youcanprint, firmada dae su regista Mauro Aragoni e dae s’illustradore Stefano Garau. Tres dies de riflessiones e cultura chi ant rugradu s’Ogiastra dae su 18 a su 20 de trìulas, in un’itineràriu chi at unidu arte visiva, memòria istòrica e identidade.
Su giru at pigadu at printzipiadu chenàbura su 18 de trìulas in sa Biblioteca Emilio e Joyce Lussu de Tortolì at sighidu sàbadu 19 in intro de su fèstival literàriu Costellazioni Letterarie de Lotzorai, dirìgidu dae Matteo Porru, e s’est concruidu domìnigu 20 in un’atmosfera ammajadora, a s’intrinada, in su Parcu Archeològicu de Seleni de Lanusè, dae in antis sa Tumba de sos Gigantes Seleni II.
Sas seradas de Tortolì e Lanusè las at introduidas e moderadas Nadir Congiu, ghia acanta su Parcu Seleni, e arrichidas dae sa partetzipatzione de Andrea Loddo, artista e divulgadore culturale, chi at presentadu una Mustra Nuràgica cun brunzetos, ispadas e iscudos ispirados a sa tziviltade nuraghesa, totus realizados in modu artigianale. Loddo, autore fintzas de su docufilm Radici di Bronzo – La Terra dei Sardi, at acraridu su allegadu de su traballu suo de archeologia isperimentale e de su primu addòbiu cun Aregoni.
Su giornaleddu “Shardana – Bronzo e Sangue”, ambientadu in un’universu èpicu chi aunit mitologia sarda, archeologia nuraghesa, gherra e maghia, contat s’istòria de duos frades shardana, sambebàrios mertzenàrios a su servìtziu de su faraone egìtziu.
Durante sos addòbios, Aragoni e Garau ant contadu sa gènesi de s’òpera, su protzessu creativu, sas fontes istòricas e sas chircas chi ant fatu. «Sa Sardigna – at afirmadu Aragoni – est una terra chi at originadu una de sas tziviltades prus dèchidas e isvilupadas de su Mediterràneu. Devimus imparare a la contare cun fieresa».
Stefano Garau, fumetista ativu in su mercadu frantzesu, at cumpartzidu su percursu personale suo, ispieghende comente, mancari siat crèschidu in Roma dae babbu sardu, apat bìvidu dae pipiu sos efetos de sos istereòtipos contra sos sardos, a s’ispissu pintados comente pastores ruzos e ignorantes. «Cando so bènnidu a ischire de su traballu de Mauro Aragoni, apo proadu unu trumbullu de orgòlliu. Pro custu apo intesu su bisòngiu de collaborare cun issu».
Ambos duos sos autores ant postu a notu comente òperas che a Shardana – Bronzo e Sangue, gasi comente is traballos tzinematogràficos, potzant devènnere trastos de fundamentu pro avalorare sa Sardigna, dare cuscièntzia istòrica a is levas noas e afortiare s’identidade de is sardos, a s’ispissu minispretziados dae pregiudìtzios isballiados.
A custu propòsitu, Nadir Congiu in unu de sos interventos galanos suos, at naradu chi, gràtzias a su traballu de Mauro Aragoni, «immoe èssere sardos est unu bàntidu, est togu», ca at permìtidu a medas de torrare a iscobèrrere unu passadu gloriosu, a s’ispissu ismentigadu o postu a una banda.
Su giru de presentadas at permìtidu fintzas momentos de addòbiu diretu e cumpartzimentu cun su pùblicu: cada serada est istada animada dae dimandas, interventos e riflessiones, a cunfirma chi su pùblicu tenet bisòngiu de narratziones sardas abbistas e poderosas. Sos duos autores ant firmadu còpias de su giornaleddu e annuntziadu fintzas progetos benidores: Aragoni at antitzipadu un’òpera dedicada a Amsìcora, eroe de sa resistèntzia sardu-pùnica contra Roma, mentras su continu de su film Nuraghes – L’arena est galu in fase de isvilupu.
Aragoni, classe 1988, est connotu a livellu internatzionale pro àere dirìgidu That Dirty Black Bag (Netflix/AMC) cun Travis Fimmel de Vikings e Aidan Gillen de Game of Thrones) e pro Nuraghes L’Arena (cun Salmo). Dae su 2024 est fintzas iscenegiadore pro Bonelli de sa sèrie s’istòrica de Dylan Dog.
Stefano Garau, ativu dae meda in su mercadu frantzesu, at traballadu pro sa domo editora Glénat pro tìtulos comente Ivanhoe (publicadu in Frantza fintzas de Mondadori) e Roi Midas pro sa sèrie La Sagesse des mythes.
Foto cobertina: Max Maddanu fotografo
