Cada annu, tra su de tres domìnigos de austu e su segundu domìnigu de cabudanni, Tortolì s’ànimat cun sas tzelebratziones de Is Festas de Sartu, dedicadas a sos santos patronos de sas crèsias de su sartu de Santu Lussùrgiu, Santu Millanu e de su Santìssimu Sarbadori. Custas festas, raighinadas in sa cultura e in sa devotzione locale, rapresentant unu momentu de partetzipatzione comunitària manna.
Pro cada festa, unu comitadu ghiadu dae un’Obrieri, s’òcupat de organizare e allichidire sas crèsias dedicadas a sos santos. Unu mese in antis, “is devotus”, est a nàrrere sos chi faghent parte de su comitadu, faghent “sa cica” pro regòllere su dinari chi serbit a pagare sos sonadores, sos cantadores, su palcu, sos coetos e totu su chi serbit pro sa festa.
Sas tzelebratziones cumintzant sa chenàbura cun unu rituale particulare: su de s’Imbidu, acanta benit postu a s’asta su giale chi simbulègiat su giù de sos boes chi depet tirare su carru cun su còciu de imbirdu, cun a intro s’istàtua de su santu. In sa pratza de sa Catedrale de Sant’Andria, totu sa bidda s’atopat pro pigare parte a custa asta pùblica simbòlica. Chie faghet s’oferta prus arta, a s’ispissu comente promissa pro una gràtzia retzida, divenit “s’Imbidadori”, su bardianu temporàneu de su giù chi at a tragare su carru de su santu in sa professone.
Pro sa festa de su Santìssimu Sarbadore, sos “imbidus” sunt duos: su primu pro su giuale de sos boes e su segundu pro Santu Sarbadoreddu, un’istatuedda pitica de su santu. Sos chi s’agiùdicant s’asta, acumpangiados dae su comitadu, parentes e amigos, faghent unu cumbidu in domo issoro, cun ballos e cantos.
Sa die de sa professone, s’istàtua de su santu benit collocada in su còciu e postu in su carru tiradu dae sos boes cuncordados cun frocos colorados e frores, “is bois mudaus”. Sa professone movet cun su comitadu e fatu fatu sos fideles dae sa Catedrale de Sant’Andria conca a sa crèsia de su sartu, a sonu de bisonas, chi acumpàngiat su càntigu de su Rosàriu. Sa professone si concruit cun sa tzelebratzione de sa Santa Missa in sa crèsiedda foras de sa bidda.
Sa primu Festas de Sartu de s’annu est da de San Lussòriu (Lussùrgiu pro sos tortoliesos), chi est in programma domìnigu chi benit. Ocannu s’Imbidadora est Diana Mascia, chi s’at agiudicadu su giuale cun un’oferta de 200 èuros.
Su ritu de “s’Imbidu”, chi bolet nàrrere “inditare“, si pensat chi bèngiat dae Ispagna. A unu tempus si poniat a s’asta s’istàtua de su santu matessi, ma a pustis, pro semplificare su rituale, si fiat detzìdidu de pònnere a s’asta su giuale de sos boes ebbia. Oe, custa traditzione s’agatat petzi in Tortolì, ma fiat presente fintzas in àteras biddas de Sardigna. In Loceri, a esèmpiu, pro Santu Isidoru e peri pro Santu Sebastianu, su rituale fiat connotu comente “sa Dita” (nùmene chi dipendet semper dae su faeddu didu, pòddighe), e un’usàntzia che a sa de Tortolì, s’agatat fintzas in Lotzorai, pro Santu Sebastianu etotu.
Fotos leadas dae sa pàgina facebook “Comitato San Lussorio Tortoli”
Pro nde ischire de prus
Tortolì. Feste e… festas de santu
Càstia S’Imbidu de ocannu pro Santu Lussòriu
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
