Sa Sardigna partetzipat torra a su cuncursu “Italian Tree of the Year 2024”, organizadu dae sa Giant Trees Foundation odv, in collaboratzione cun su Ministèriu de s’Agricultura, de sa Soberania Alimentare e de sos Padentes. In s’editzione colada, s’ìsula at bìnchidu cun s’ogiastru de Santu Baltolu, connotu comente “il Patriarca”, chi, cun in prus de 3.000 annos, est istadu reconnotu s’Àrbore prus antigu de Itàlia e su de tres de Europa.
Ant a “gherrare” pro su tìtulu sos partetzipantes de sas bator macroregiones italianas – Nord, Tzentru, Sud e Ìsulas. Sa Sardgina est rapresentada dae s’eni de Matari, in su Supramonte de Orthullè, su prus mannu de sa Sardigna, chi tenet una tzircunferèntzia de 5 metros e un’artària de 17 metros. Custa mata maestosa s’agatat a un’artària de 900 metros subra de su livellu de su mare.
Su cuncursu est giai cumentzadu e s’at a concruire su 20 de santandria. Sos bator finalistas ant a pòdere contare subra su sustennu de su pùblicu pro mesu de su votu in lìnia.
Su cuncursu punnat a avalorare sos àrbores monumentales italianos, seletzionende sas meravìllias botànicas iscritas in s’elencu de sos Àrbores Monumentales Italianos (AMOS). Como, in Itàlia sunt tzensidos belle 5.000 esemplares de matas monumentales, de custos pagu prus de 400 sunt in Sardigna.
Pro votare est a incarcare custu acàpiu e a s’assentare cun sa posta eletrònica. Faghet a votare una borta ebbia finas a su 20 de santandria. Una bia votadu incarchende su butone “Vota questo albero”, tocat a cunfirmare sa preferèntzia aberende su curreu eletrònicu impreadu pro si registrare. S’àrbore binchidore at a èssere premiadu su 21 de santandria in su Cunvegnu internatzionale de arboricoltura, in ocasione de sa Die natzionale de sos àrbores. Su tìtulu italianu at a permìtere a s’àrbore de partetzipare fintzas a su cuncursu europeu de su 2025.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
