Est ufitziale, s’Eni de Matari at a rapresentare s’Itàlia a sa cumpetitzione europea pro s’Àrbore de s’Annu 2025
Cun in prus de 27.000 votos, s’Eni de Matàri, in su Supramonte de Orthullè, in Ogiastra, est istadu elègidu Àrbore de s’Annu 2024 pro s’Itàlia. Sa proclamatzione est acontèssida in s’eventu organizadu dae sa Giant Trees Foundation, in Friuli-Venètzia Giùlia.
S’Enide Matàri at a atzèdere a sa cumpetitzione europea pro s’Àrbore de s’Annu 2025 e s’at a disafiare cun sos àrbores prus rapresentativos de àteros Paisos. S’annu coladu, sa cumpetitzione europea dd’at bìnchida un’àrbore polacu, mentras sa Sardigna aiat conchistadu su de tres postos cun su s’ogiastru millenàriu de Luras, S’Ozastru de Santu Baltolu, connotu fintzas comente “Su Patriarca”.
S’Eni de Matàri est arribbadu a in antis de sos tres finalistas italianos: S’araucaria de Nervi, mutidu “The Italian Dragon”, chi at otentu su de bator postos, s’abete de Douglas prus artu de Itàlia, lòmpidu a sa de tres positziones, s’opinu loricato Italus, s’àrbore prus antigu de Europa, chi creschet in s’Apenninu Calabresu-Lucanu, arribadu a su segundu postu.
S’Eni de Matàri, in prus de su valore botànicu e estèticu suo dèvidu a sa mannaria e a s’imponèntzia sua, est unu sìmbulu de sa bellesa agreste de su Supramonte, unu de sos logos prus preservados de sa Sardigna. “S’àrbore nostru – at naradu sos de s’amministratzione comunale de Orthullè, ghiada dae su sìndigu Ennio Arba – est parte de unu territòriu ùnicu, sa “Green Zone” Ogiastra, chi acasàgiat una biodiversidade rica e fintzas una de sas chimbe Zonas Blu de su su mundu, in ue sa gente costumat a imbetzare de prus.”
S’amministratzione de sa bidda de su Supramonte at bòlidu torrare gràtzias pro custa marrania a sa Giant Trees Foundation, mestamente pro su traballu sena pasu de promotzione e amparu de sos àrbores seculares, e a totus sos chi cun passione ant votatu s’Eni de Matàri, sìmbulu de su monte e de sa cultura de Orthullè e de totu s’Ogiastra.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
