Intervistadu dae sos de La Nuova Sardegna sas dies a pustis de sas abbas pròidas e de sas paratias abertas in sas digas, su ministru pro sa Protetzione tzivile Nello Musumeci at naradu chi sa de sos dissaladores est «una solutzione integrativa semper prus netzessària» e chi s’abba de mare desalinizada «agiudat a islebiare unu sistema ìdricu locale chi no est bastante. Mesches si bi la sighimus cun s’errore de abbare sos sartos cun abba potàbile, unu lussu chi non nos podimus permìtere prus».
Cheret chi nche pongiamus a banda sa chistione de sos paràmetros a s’ispissu in foras de norma pro su chi pertocat s’abba de sa rete: diat bastare una rassigna in lìnia ma finamentas un’abbaidada a sos albos pretòrios de sos Comunes pro cumprèndere chi medas bortas no est potàbile sa chi dìamus pòdere bìere o impreare pro sos macarrones o pro unu brou. Pongiamus·nche·la a banda custa chistione, fintzas ca su gestore de s’abba non potabilizat sa chi est pro sa massaria.
E gasi etotu fatzamus cun sa mùrgia de sos dissaladores che chi su dissipu suo non siat unu problema. Chistionemus ebbia de sos consumos energèticos, duncas. Si narat chi unu dissaladore modernu a osmosi inversa consumat unos 3 kWh cada metru cubu de abba durche otènnida. E canta bi nde cheret pro sos campos? Datos de pagos annos a como faeddant de 479 milliones de metros cubos (de sos 720 cumplessivos) petzi pro su cumpartu irriguu.
Su problema duncas est de màdrighe energìvora. Comente bi la fornimus s’energia chi lis bisòngiat a custos dissaladores? Si bi ponimus agigu de colore e pigamus in cunsideru su birde ebbia, bidimus chi est su matessi problema de s’idrògenu green (fintzas custu a osmosi inversa). Cantas installatziones de Fer bi diant chèrrere pro alimentare unu dissaladore? Est un’arresonu chi podimus fàghere in custu cuntestu nostru? Chi siat custu su lussu chi non nos podimus permìtere? S’alternativa est a los fàghere funtzionare produende cantidades mannas de Co2, una diretzione chi est a s’imbesse de sa punna decarbonizadora.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
