Domìniga sos sardos ant a votare pro seberare su presidente de sa Regione e su Cussìgiu regionale.
Su sèberu est tra bator candidados a sa presidèntzia: Lucia Chessa (Sardigna R-esiste), Alessandra Todde (Campo Largo de tzentrumanca e M5s), Renato Soru (Coalitzione sarda sustentadu dae Itàlia Viva, Azione e +Europa), Paolo Truzzu pro su tzentrudereta.
Si podet espressare su preferu pro una lista e pro unu candidadu presidente non collegados tra issos (votu isgiuntu) e est prevìdida finas sa possibilidade de espressare duos preferos pro cussigeris de gènere diferente ma chi siant de sa matessi lista. Pro èssere eletu a su candidadu presidente bastat sa majoria, fintzas relativa, de sos preferos.
De assignare b’at 60 sègios: 59 prus su segundu classificadu tra sos candidados presidentes. Oto sas tzircuscritziones eletorales: Casteddu, Carbònia-Igrèsias, Mèdiu Campidanu, Nùgoro, Ogiastra, Terranoa-Tèmpiu, Aristanis e Tàtari. Casteddu at a èssere sa prus rapresentada cun 20 cussigeris, sighida dae Tàtari cun 12. Nùgoro nd’at a tènnere 6, comente Aristanis e sa Gaddura, 4 ant a èssere sos elettos in su Surcis, 3 in su Mèdiu Campidanu e 2 in Ogiastra.
A sas listas de sa coalitzione binchidora at a èssere assignadu unu prèmiu de majoria: su 60% de sos sègios si su presidente eletu otenet una pertzentuale de preferos superiore a su 40%, su 55% de sos sègios si otèngiat una pertzentuale de preferos cumprèndidu tra su 25% e su 40%, nemos suta de su 25%. Sa lege previdet fintzas un’isbarramentu pro intrare in su Cussìgiu: su 10% pro sas coalitziones e su 5% pro sas listas sìngulas.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
