Sa Corte de Apellu de Casteddu at istabilidu ca no ddue tenet presupostos pro sa decadèntzia de sa presidenta de sa Regione, Alessandra Todde, retzende petzi in parte su recursu presentadu dae sa matessi guvernadora. Però abarrat cunfirmada sa santzione amministrativa de baranta mìgia èuros pro s’irregularidade in is torracontos de sa campagna eletorale.
Is giùighes ant declaradu nulla sa parte de sa detzisione pretzedente chi ipotizaiat sa violatzione de s’artìculu 15, coma 8, de sa lege 515 de su 1993, norma chi disciplinat sa trasparèntzia e sa curretesa de is torracontos de is campagnas eletorales.
Importu mannu dd’at tentu fintzas su pronuntziamentu de sa Corte Costitutzionale, chi cun sa sentèntzia n. 148/2025 aiat giai annuddadu s’ordinàntzia de su Collègiu de garantzia eletorale in sa parte chi disponiat sa possìbile decadèntzia de sa presidenta. Sa Corte de Apellu, tando, at pigadu atu de sa sentèntzia escludende duncas sa possibilidade de eletziones noas.
Si dae una banda benit esclusu s’arriscu polìticu prus mannu, dae s’àtera sa detzisione cunfirmat chi in sa rendicontatzione de sa campagna eletorale ddoe at tentu errores. Pro custu is giùighes ant denegadu su restu de su recursu, lassende invariada sa santzione pecuniària de barante mìgia èuros giai istabilida dae su Collègiu de garantzia eletorale de sa Regione Sardigna.
Segundu sa normativa in vigèntzia, difatis, is irregularidades in is torracontos non cumportant in manera automàtica sa ruta dae sa càrriga, ma a ogna contu podent determinare santziones econòmicas, comente prevìdidu de sa matessi lege 515/1993.
Sa possibilidade de una decadèntzia de Todde in custos meses aiat alimentendu s’ipòtesi de una torrada antitzipada a su votu, ma cun custa sentèntzia ogna possibilidade est posta a una banda.
Pro s’ora no est lòmpidu perunu cummentu dae sa guvernadora sarda chi est pro lòmpere Bruxelles, acanta, cras est dàbile chi fatzat una cunferèntzia de imprenta in ue at a faeddare fintzas de sa detzisione de sa Corte de Apellu. Satisafatzione manna dae banda de su M5S, mentras su deputadu de Fratelli d’Italia, Salvatore Deidda allegat de “pretzedente giurìdicu e polìticu chi non nche podet lassare indiferentes”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
