Su Comunu de Tortolì organizat unu cunvegnu dedicadu a Sa Die de sa Sardigna, die de su pòpulu sardu, tzelebratzione chi regordat s’abolotu populare de su 28 de abrile 1794, cando is sardos si fiant pesados contra a is piemonteis e nche ddos aiant bogados dae Casteddu.
S’eventu s’at a fàghere martis su 29 de abrile, dae is 10.00, in su Teatru Santu Frantziscu. A su cunvegnu, abertu a totu sa tzitadinàntzia, sunt invitados a partetzipare is pitzocos de is istitutos superiores de Tortolì.
Sa die at a èssere aberta dae is saludos istitutzionales de su Sìndigu de Tortolì, Marcello Ladu, e de su Cussigeri Comunale On. Salvatore Corrias.
Su giornalista Pier Sandro Pillonca, in calidade de moderadore, at a introduire su tema de su significadu de “Sa Die” pro sa Sardigna cuntemporànea, cun una riflessione in contu de prospetivas noas de s’identidade isulana in su de tres millènnios.
Anna Cristina Serra, poetessa e operadora culturale, at a faeddare de sa limba e de sa poesia comente fundamentu de s’identidade sarda e risursas fundamentales pro su benidore
Su programa at a èssere allirgadu dae una sonada de su sonadore de launeddas Alessandro Podda, sighidu dae is interventos de is operadores de s’isportellu linguìsticu comunale, chi ant a allegare de is eroes de sa Sarda Rivolutzione e de s’eredade chi ant lassadu a is levas noas.
In sa parte finale, Pier Sandro Pillonca at a chistionare de poesia improvisada in limba sarda, reconnota comente unu de is elementos culturales distintivos chi projetant sa Sardigna in su panorama europeu e mundiale. A concruos ddoe at a èssere sa gara de is poetas Bruno Agus, Giuseppe Porcu e Dionigi Bitti, acumpangiados dae is boghes de su Tenore Ogiastra.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
