Su Vaticanu est apressibende pro s’eletzione de su sutzessore de Paba Frantziscu. Su Conclave s’addòbiat forsis dae su chimbe de maju: sunt 135 is cardinales cramados a votare, intre però issos ufitzialmente no ddoe est su nùmene de Angelo Becciu, su sardu delegitimadu de is diritos cardinalìtzios dae Bergoglio etotu.
Como sa partetzipazione de Becciu abarrat unu misteru: issu narat ca dd’ant cunvocadu, ma in sa lista presente in su situ ufitziale de su Vaticanu su nùmene suo figurat comente “cardinale non elettore”. In un’intervista a L’Unione Sarda su purpuradu de Patada at decraradu chi cudda lista non tenet valore de livellu giurìdicu pro more ca su paba- at naradu- no aiat acraradu sa voluntade de nche ddu bòlere bogare dae su Conclave.
In su mese de cabudanni de su 2020, sotadu dae paba Frantziscu etotu, Becciu aiat lassadu s’incàrrigu de Prefetu de sa Cungregatzione de is càusas de is santos, e finamentas is diritos chi aiat comente cardinale. Is motivos de custu sèberu sunt acapiados a un’inchesta chi pertocat unas cantas operatziones finantziàrias fatas dae sa Segreteria de Istadu in ue Becciu traballaiat. Mescamente sa còmpora in su 2014 de un’immòbile in Londra, pagadu 200 milliones de èuros, e s’impreu de dinari de s’Obolo di San Pietro, destinadu a is pòberos, pro àteras atividades chi non diant dèpere tènnere nudda de fàghere cun s’agiudu a is bisongiosos. In nadale de su 2023, Becciu benit cundennadu in primu gradu, su giudìtziu de apellu est prevìdidu in s’atòngiu de ocannu iscriet Repubblica
Segundu su giornale, dae in antis a unu casu chi non tenet pretzedentes in s’istòria de su Vaticanu est dàbile chi Becciu non siat esclusu. Difatis, a bisu de Pierluigi Consorti, dotzente de Dirittu ecclesiasticu in Pisa, “pro sa Crèsia est mègius a ddu inclùdere, ca boghende· nche·ddu si diat pònnere su Paba nou in una cunditzione de debilesa“.
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
