Tres tapas, tres iscolas, un’ùnica idea: fàghere bìvere Grazia Deledda fintzas foras dae is pàginas de is òperas suas. Est custu su coro de “Abitare Grazia”, su laboratòriu promòvidu dae su Club Jane Austen Sardegna chi, dae su 28 de abrile a su 26 de maju, at a portare sa boghe de s’iscritora nugoresa intre L’Aquila, Biddaxidru e Gùspini.
S’initziativa s’insertat in intro de su tzentenàriu de su Prèmiu Nobel intregadu a Deledda e proponet un’acostamentu diferente dae sa sèlita letzione traditzionale: no anàlisi acadèmica, ma esperièntzia direta de sa letura. Unu percursu interativu pensadu pro is istudiantes, totu a s’indonu e sena costos pro is istitutos interessados.
Su progetu, nàschidu in intro de su fèstival Dicembre Letterario, est giai cumentzadu in is chidas coladas in Sardigna, cun sa primu tapa a su Cunvitu Natzionale de Casteddu e cun un’addòbiu a s’IIS Asproni de Igrèsias. Come s’at a giumpare su mare, lompende pro sa prima bia a continente.
A abèrrere su giru de presentadas, difatis, at a èssere sa tapa de su 28 de abrile in su Cunvitu Natzionale de L’Aquila, in una tzitade Capitale italiana de sa Cultura 2026. Inoghe su laboratòriu at a èssere ocasione de addòbiu e cunfrontu, pro torrare a donare a Deledda sa dignidade de autora cuntemporànea, galu a tretu de faeddare a is levas noas.
Su percursu at a sighire in Sardigna: su 23 maju in su Litzeu clàssicu e linguìsticu de Biddexidru e su 26 de maju in s’IIS Volta de Gùspini. Duos addòbios chi cunfirmant sa punna de su progetu: intrare a is iscolas non comente faina agiuntiva, ma comente esperièntzia capatza de furriare sa letura a calicuna cosa de biu e cumpartzidu.
«Seberare unu libru, a ddu lèghere e posca ddoe intrare a intro», ispiegant sa diretora artìstica Giuditta Sireus e sa presidenta Gabriela Podda. Est custa sa crae de su laboratòriu: fàghere de sa letura unu momentu umanu, capatzu de lassare rastros e generare pregontas.
“Abitare Grazia” contat gasi sa dòpia ànima de su Club: dae una banda s’arraigamentu in Sardigna, pro mesu de su traballu cun is iscolas e is comunidades; dae s’àteru s’abertura cara a sa penìsula, giughende a foras de s’ìsula una figura comente sa de Deledda sena dda trasformare in sìmbulu istàticu, ma mantenende·dda bia, dinàmica, atuale.
Su progetu est sustentadu dae sa Fondazione di Sardegna, cun s’interessu de sa Regione Autònoma de sa Sardigna e de s’Assessoradu a sa Cultura, cun s’obietivu cumpartzidu de propònnere a s’atentzione natzionale una de is boghes prus importantes de sa literadura italiana.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
