Istrumada atzessìbile e segura comente diritu umanu fundamentale. Initziativa de sos tzitadinos europeos. Sa campagna “My Voice, My Choice” dat a is tzitadinos europeos sa possibilidade de megiorare sa vida de sas persones prìngias pro chi siant prus lìberas e prus seguras, in cada logu nch’istent in s’Unione nostra, sena cunsiderare sas cunditziones issoro.
“Comente Strajk Kobiet Sardynia, tzèllula de su movimentu polacu Ogólnopolski Strajk Kobiet, firmatàriu de s’initziativa My Voice, My Choice cun Marta M. Lempart e Wschód,- at cumentadu s’ativista banaresa Claudia Porcheddu- semus comintzende a collire firmas pro s’initziativa de is tzitadinos europeos chi punnat a garantire sa possibilidade de interrutzione de gravidàntzia a cada persone in s’UE”.
Sa campagna “My Voice, My Choice” dat a is tzitadinos europeos sa possibilidade de megiorare sa vida de sas persones prìngias pro chi siant prus lìberas e prus seguras, in cada logu nch’istent in s’Unione nostra, sena cunsiderare sas cunditziones issoro.
Sa mancàntzia de custa possibilidade in unos cantos logos de Europa non cajonat dannos fìsicos ebbia, ma cundennat sas persones e sas famìlias (bortas medas aoradas e disamparadas) a unu stress econòmicu e psicològicu chi si diat pòdere evitare.
Su de tratare s’assistèntzia riprodutiva comente unu lussu, est cosa prus chi non nòdida chi non riduet su nùmeru de interrutziones. Est gasi chi creschent sas istrumadas clandestinas.
Pro mudare custa situatzione invitamus sa Commissione europea a presentare, cun ispìritu de solidariedade, una proposta de sustennu finantziàriu a sos istados membros pro chi si potzat garantire a chie si siat in Europa sa possibilidade de istrumare in forma legale e in cunditziones de seguresa.
“Sa mancàntzia de custa possibilidade truncat, iscussertat e annullat unu muntone de vidas e capatzidades de sussistèntzia. Totu custu cheret chi finat. Cun custa iniziativa de sos tzitadinos europeos- at agiuntu Porcheddu – amus a colare a una polìtica prus giusta chi dat espressione a sos valores europeos nostros in manera prus solidale e cuncreta”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
