«Semus a disponimentu pro un’arresonada in contu de energia nucleare, ma devet èssere neta, ca b’at oriolos pro su chi pertocat sa gestione de sas iscòrias, pro sas tecnologias atuales».
Paràulas chi at naradu Alessandra Todde ingendrende unu grandu abbolotu. De badas. Ca si at naradu chi emmo a una produtzione de energia atòmica chi non b’est (pro mèdiu de fusione), est craru chi cussu emmo est unu nono a sa chi est produida cun sa fissione.
Est un’arresonu chi sa polìtica semplìficat sena ischire nemmancu de ite est chistionende: ca in antis de su 2080 non bi dêt àere peruna produtzione energètica industriale pro mèdiu de sa fusione; ca pro more sos gastos de fràigu prus chi no artos sa fusione andat bene in logos cun densidade manna de populatzione e cun indùstrias in tretos metropolitanos; ca mancari non produat iscòrias emitet una cantidade manna de radiatziones comente neutrones e rajos gamma, sas prus malas a ischermare.
Duncas is polìticos nostros si nch’essint cun pagu e cussu pagu chi nos bastet. Ma immaginemus·nos a Todde narende chi emmo a su nucleare atuale (e chi duncas is chi l’ant criticada no apant leadu unu gatu pro una trìbide): Todde diat èssere de acordu a sas tzentrales in terra sarda o, coerente cun sa projetzione italiana sua, addae de su Tirrenu? Pro seguru sa segunda, ca inoghe nât chi non bi cheret nemmancu su depòsitu de sas iscòrias.
E como immaginemus·nos·la a Todde narende chi emmo a su nucleare atuale ma abarrende cun s’idea chi Todde est Todde e chi s’istadu italianu est s’istadu italianu («Deo so deo, e bois…», a sa nâda de Alberto Sordi in su “Marchese del Grillo”). Seguros semus chi dae Roma nos diant pònnere in ungras un’aina pro s’indipendèntzia energètica?
Si est beru chi s’istadu italianu nos cheret male, iscòrias e ispeculatzione tinta a birde ant a èssere su mix perfetu. E in totu custu, totu cantos, semus perdende un’ocasione pro chistionare de decarbonizatzione.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
