Si s’allega in contu de sa manifestatzione de Sacàrgia diat pàrrere pinnigada a sas esigèntzias de chie nde cheret faeddare artziende·nche·la a grandu manifestatzione populare, a un’ala, o de chie la cheret minispretziare, a s’àtera, sa chistione funduda pertocat semper sa natura de custu assàchiu nou, chi non podet èssere giuigadu movende da su contu de sa gente chi b’aiat in unu eventu. S’allega meresset dimandas, e mescamente rispostas. Tècnicas.
In custas dies sos coordinamentos contra a s’ispeculatzione nd’ant istèrridu unas cantas, de dimandas, a sa presidente Todde e a sa Giunta sua: «A b’est unu pianu energèticu? A bi l’amus un’istùdiu in contu de s’abbastu nostru? Comente intrat in giogu su metanu in sa fase transitòria? Est issu chi bi cheret in càmbiu de sas tzentrales a carbone o sos 6,2 GW de rinnovàbiles noas? Ite si cheret fàghere in contu de Tyrrhenian link e cale assentu b’at cunformas a sas modalidades operativas de Terna? B’at una pianificatzione, unu cronoprogramma pro serrare sas tzentrales alimentadas dae fonte fòssile? Ite serrades e ite minimades? Portovesme, Portu Turre, sa Saras? B’at una programmatzione cumpartzida?».
Sas dimandas nche sunt in intro de unu comunicadu istèrridu a pustis de sas paràulas de sa presidente Todde in fatu a sa manifestatzione de Sacàrgia («sa contrariedade a s’ispeculatzione cheret fata in forma curreta»). Paràulas chi non sunt pràghidas a sos comitados. «S’ischidada de sa democratzia partetzipativa – narant – diat dèvere fàghere nàschere gosu e ispìritu de collaboratzione, non crìticas pro mèdiu de s’imprenta».
E est dae cussas dimandas chi sos comitados pedint collaboratzione, annanghende·bi·nde àteras in contu de raportos istadu – regiones. «In su decretu in aprovatzione, pro ite ais atzetadu su mìnimu de 6,2 GW e no ais impostu unu lìmite màssimu? Pro ite emmo a s’abrogatzione de s’artìculu 10 chi, mudadu cun istrategia, podiat funtzionare comente moratòria natzionale? Pro ite seis ignorende sa problemàtica de 809 rechestas de connessione pro una potèntzia totale de 57,67 GW? Cale est sa positzione pro su chi pertocat s’off shore e sas rechestas de 17 GW. Pro ite pro s’acontzu de sos impiantos in esertzìtziu non balent sas tutelas de su decretu 42 de su 2004?».
Carchi cosa a l’amus a ischire?
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
