Dae Ceraxus a Bruxelles: birrifìtziu sardu premiadu cun sa medàllia de oro a su cuncursu europeu

S’est concruida martis su 21 de onniasantu in sa tzitade belga de Gand sa premiatzione de su Brussels Beer Challenge, unu de sos cuncursos birràrios prus importantes de Europa e unu de sos prus mannos a livellu internatzionales.

A su cuncursu ant pigadu parte prus a mancu 1800 birras bènnidas de totu su mundu chi sunt istadas giudicadas dae tastadores espertos professionistas.
Sas birras fiant partzidas in categorias e postas a pare pro istile, tipitzidade e orìgine. Sas mègius birras de cada categoria sunt istadas premiadas cun una medàllia de oro, de prata e de brunzu.

S’Itàlia s’est torrada a cunfirmare intre sas 3 natziones prus premiadas cun 34 medàllias tra sas cales 8 oros, 7 pratas e 19 brunzos. Su birrifìtziu Mezzavia de Ceraxus at otentu – ùnicu tra totus sos produtores italianos in cuncursu – , 3 medàllias, de sas cales 2 de oro e 1 de brunzu. Bonas sas noas fintzas pro sas àteras birras sardas, chi ant otentu reconnoschimentos de importu mannu. Medàllia de prata pro sa birra Porter de su birrifìtziu Puddu de Santa Justa (Aristanis) e medàllia de brunzu pro sa Darqside de su birrifìtziu Brew Bay de Casteddu.

Pro canto pertocat su birrifìtziu Mezzavia, sas medàllias de oro sunt istadas intregadas a sa Gare de Roubaix, ‘bière de garde’ prodùida dae su 2014 (annu de sa primu partetzipatzione a e afirmadura a livellu internatzionale a su Bbc) e a sa City Folk, ‘American pale ale’, produida dae pagu ma giai premiada fintzas dae Slow Food. Sa medàllia de brunzu est istada donada a sa Corba, una brown porter de istajone prodùida in s’atòngiu.

“S’afirmadura de su birrifìtziu nostru a su Brussels Beer Challenge no est una novidade – ant cumentadu cuntentos mannos sos responsàbiles de Mezzavia – sende chi in annos colados sas birras nostras si sunt afirmadas paritzas bortas (2014, 2016, 2018, 2020) otenende medàllias de balore e collochende∙si in postitziones de contu, gasi comente sos àteros reconnoschimentos conchistados in custos 8 annos chi semus traballende”.

Advertisement. Scroll to continue reading.

Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22

Attività realizzata col contributo della Regione Sardegna – IMPRENTAS 2021-2022. LR 22/2018, art. 22