Sos 28 puntos de su pianu de paghe propostu dae s’amministratzione Trump pro sessare sa gherra in Ucraina est in s’agenda de atores polìticos, de analistas e de mèdios de comunicatzione presentende·si che a una mediatzione chi non pertocat cussos tretos ebbia, cussos pòpulos, sas limbas issoro.
Beru, Kiev devet tzèdere a Mosca fintzas sos territòrios chi non controllat e Putin pretendet su bilinguismu in totu s’Ucraina como chi sa gherra de invasione at ingendradu una ucrainizatzione chi at interessadu paritzos russòfonos (sa chistione linguìstica ucraina est sa chi pus pagu amus sighidu in Sardigna e custu non giuat pro s’isvilupu de su movimentu nostru, si oramai bi nd’at unu).
Unos cantos puntos pertocant sos afares. Comintzende dae sos profetos de sa ricostrutzione co-gestida dae russos e americanos. Un’àteru, su de 13, narat chi «sa Rùssia cheret torrada a integrare in s’economia globale» e chi «sos Istados unidos ant a istipulare un’acòrdiu de cooperatzione econòmica» pro s’isvilupu de ambas economias «in sos setores de s’energia, de sas risorsas naturales, de sas infrastruturas, de s’intelligèntzia artifitziale, de sos data center, de sas estratziones de metallos dae sas terras raras de s’Àrticu». Cun sa «Rùssia invitada a intrare torra in su G8». Comente cariasedda sas votatziones, cun sa punna de nche bogare a Zelensky a pustis de l’àere umiliadu.
Ma si est beru totu custu beru est finamentas chi est parte de sos disinnos de sa Rùssia su de re-perimetrare s’ispàtziu ex sovièticu in favore suo (e chi duncas, economia mundiale a banda, no a renuntziare a passos a dae in segus in contu de territòrios ocupados e chèrfidos), e chi in sa Costitutzione ucraina b’at un’artìculu chi cheret connotu, su 73. Chi faeddat de referendum in contu de mudadas de su territòriu natzionale (Стаття 73. Виключно всеукраїнським референдумом вирішуються питання про зміну території України). No est chistione chi finit in custas dies.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
