Fiat su 60 in antis de Cristos cando Tzèsare, Pompeu e Crassu disinneint de controllare sa Repùblica romana – oramai intrindende·si·nche – pro mèdiu de un’acòrdiu privadu chi nche brincaiat sos mandos de su Senadu. Cun unu patu extra ordinem deint vida a su Triumviradu. Cun su Board of peace s’istòria nos presentat un’acòrdiu privadu nou e un’organismu chi si nd’afutit de su diritu internatzionale atuale mancari fraitzu e belle mai in favore de sos pòpulos.
Sa caraterìstica chi nd’essit a campu est chi – a lughe de sole e non prus a cua – sas crisis globales ant a èssere gestidas che chi esserent asset immobiliares. Trump, su Tzèsare populista, est como acanta a ghiare custu grustu de guvernantes e l’at a fàghere sine die, est a nàrrere fintzas cando sessat su mandadu suo in sa Domo arba (semper chi sas cosas non mudent fintzas in Washington).
Un’organismu chi bi cheret dinare pro intrare comente assòtziados permanentes (unu milliardu de dòllaros) e chi contat sas presèntzias de Netanyahu e de Putin (chi at giai naradu chi emmo a pònnere dinare pro cussa Gaza ispèrdida dae s’amigu suo de Tel Aviv).
Unu club pay to play chi non naschet ebbia pro fraigare una Las Vegas noa in sas ruinas palestinesas ma chi – in sa conca de Trump – tenet punnas prus mannas: isulare s’Europa e truncare s’asse Mosca-Pechinu (mescamente a pustis de su partenariadu nou intre Xi Jinping e su canadesu Mark Carney).
Proa nde siat chi in sa Carta de su Board belle mai si mentovat Gaza, petzi cando si faeddat de “Zonas econòmicas ispetziales” e de “Tzitade miràculu”. Proa nde siat – s’isulatzionismu trumpianu est una categoria bòida – chi in custa organizatzione b’at natziones de su sud est asiàticu comente Indonèsia e Vietnam. Proa nde siat s’ammonestu sorrogradu de s’Onu («Su Cussìgiu de seguresa de s’Onu l’at autorizadu petzi pro Gaza»).
Sas punnas de Trump non sunt duncas sas de si garantire ebbia su controllu de s’emisferu otzidentale, dae sa Groenlàndia a sa terra de su fogu, retirende·si·nche in cussa ala de su globu, ma sas de unu re-positzionamentu contràriu a sa Tzina impreende su Board comente mèdiu pro nche li tòddere alleados istratègicos.
Serrende·la, custu Cussìgiu est sa vitòria de sa diplomatzia de su cuntratu contra a sa de su tratadu: sa paghe no est a la firmare, est a la comporare.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
