Su bentu s’est assussegadu, sas abbas ant sessadu de còrfere sas costeras e sos artis-artis pro su tziclone Harry non sunt lompende prus a sos telefoneddos nostros. Ma, comente acontesset su prus de sas bias, luego at a colare s’abba de s’ismèntigu. Un’abba chi cugùgiat s’allega pùblica chi bi diat chèrrere e chi lassat petzi sos signos de una carella bamba intre sos allarmistas a un’ala e, a s’àtera, sos chi bident in cada precautzione unu tentativu de controllu dae artu.
E puru in sos Comunes nostros bi sunt sos pianos de Protetzione tzivile: documentos prenos de mapas e de protzeduras fintzas pro àteras acontèssidas (pensemus a sos fogos istiales). Tando sa dimanda naschet sola sola: cantos de nois connoschent custos pianos?
Semus faeddende de pianos chi non devent abarrare serrados in sos calàscios de sos munitzìpios, chi non devent èssere classificados comente pabiros de burocratzia istatale. Semus faeddende de istrumentos de subravivèntzia colletiva. Duncas, si cherimus faeddare de autodeterminatzione, de comunidades chi si lu sestant issas su caminu issoro, cheret chi movamus dae unu bisòngiu de responsabilidade pro sa terra nostra e pro chie b’istat.
Ca custa est s’autodeterminatzione: sa capatzidade de si coordinare dae bàsciu, de connòschere su territòriu mègius de àtere. Su bìviu a mesu tretu intre sos chi minimizant faeddende de una “ditadura de su mèteu” e sos chi ingendrant su pànicu nche lu brincamus in una manera ebbia: cun sa connoschèntzia difusa.
Sos inditos diant dèvere nàschere intro de nois, intre nois, faghende a manera chi sos pianos de emergèntzias siant patos de comunidade. Ite tocat a fàghere? Tocat a pretèndere chi cussos pianos siant patrimòniu pùblicu, ogetu de allega in sas pratzas e in sas iscolas, no in prefetura e in sos Coc ebbia.
Petzi sa gestione colletiva e comunitària de s’arriscu nch’ant a lassare a banda sas tzarras. Custu giru non b’at àpidu mortos, e diat èssere bellu a pòdere iscumproare chi carchi cosa est comintzende a funtzionare. Ma non giuat a nd’èssere seguros.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
