Movet dae unu datu bastante craru sa mobilitatzione noa chi punnat a “liberare su votu” de is sardos. Datu chi is ideadores de custa proposta de lege de initziativa populare nos l’ammentant làdinu-làdinu: su 2014, su 2019 e su 2024 amus votadu cun mecanismos de rapresentàntzia pagu democràticos.
Obietivu de sa campagna “Liberamus su votu” (mancari diat èssere istadu mègius s’esortativu “liberemus”) est duncas su de nche pònnere a un’ala sa cuota dòpia de isbarramentu in pare cun su prèmiu de majoria: cosas chi impedint a sas minorias organizadas, e cun deghinas de mìgias de preferèntzias otènnidas, de pòdere fàghere opositzione a sos duos polos de s’alternàntzia.
Is promotores de custa proposta proportzionalista sunt is chi sunt parte de sa rete “SardDegna Iniziativa Popolare”, entidade nàschida a pustis de s’esperièntzia de sa Pratobello 24 chi – narant – «at marcadu una distàntzia abissale intre su Cussìgiu e sas rechestas populares». E custos promotores afirmant, difatis, chi «votende sa lege eletorale oe in vigore in Sardigna, sos duos ischieramentos de tzentru-dereta e de tzentru-manca ant intèssidu unu sistema pro s’intrèveru sighidu issoro ghiende su guvernu de sa regione».
Pòddighe puntadu finamentas contra a s’eletzione direta de is presidentes de sa Giunta chi, «non de intregare a is tzitadinos ispàtzios de rapresentàntzia prus mannos, los at espropiados de su diritu de àere cussìgios regionales chi non siant presoneris de esecutivos semper prus fortes». De su restu, cale assemblea diat pòdere durare su tempus naturale de una legisladura sende chi is “guvernadores” sunt protetos dae sa fòrmula “Aut simul stabunt aut simul cadent”?
Est pro custu chi is ativistas de custa faina narant chi oe, a prus de deghe annos dae s’aprovu de custa lege, «a gente meda est prus chi non crara s’emergèntzia democràtica e s’espròpiu sufridu dae su pòpulu sardu». Sos mòdulos pro collire sas firmas los ant imbiados a totu sos Comunes de Sardigna e sa regorta comintzat su 27 de freàrgiu. Custa, in giru de pagos annos, est sa de tres propostas proportzionalistas a pustis de sa de Lìberu e de sa de Sardegna chiama Sardegna.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
