Beatrix Potter (1866 – 1943) iscritora, artista, biòloga, imprendidora e ambientalista est una de sas autoras inglesas prus amadas, istudiadas de totu su mundu. Sa vida e sas òperas sua ant ispiradu film e òperas de teatru.
Famada pro sos suos “Little-Books” , como cunsiderados clàssicos de sa literadura pro s’infàntzia, cun su ricavadu dae sa publicatzione aiat acuistadu terrinos chi aiat donadu a sa National Trust.
Imbentora de su merchandising, su solu libru de Peter Rabbit, giai in s’annu de sa prima publicatzione, su 1905, aiat bèndidu 150 milliones de còpias e, no essende mai in foras de imprenta, est istadu bortadu in 35 limbas.
Sas illustratziones de Beatrix Potter sunt cunservadas in su Victoria & Albert Museum, mentras sos istùdios suos de micologia a s’Armitt Museum and Library de Ambleside e in su Perth Museum and Arte Gallery de Perth.
Sa prima bortada in sardu de sos contados de Beatrix Potter est istada publicada petzi in su 2024, in unu volùmene bilìngue curadu dae Stefania Carta (dotora in mediatzione linguìstica e culturale e in lìteras) e dae Alessio Pani (dotore in informàtica e programadore), giai curadores e tradutores de un’antologia de contados de Grazia Deledda.
Su libru, intituladu “Pìricu Cunìlliu Pilete e àteras Contàssias” cuntenet chimbe contados e una poesia chi ant comente a protagonistas sos dispetosos conillos de Beatrix Potter. Su testu in sardu s’acumpàngiat a s’originale inglesu postu a fronte, a una biografia de s’autora e a unu glossàriu inglesu – sardu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
