Aberta in Lanusè, in s’ùrtimu pianu de su palàtziau comunale, sa sede territoriale noa de su Tzentru Servìtzios pro su Volontariadu de sa Sardegna (Csv). Presentados pro s’ocasione finas sos servìtzios a indonu ofertos dae su Csv pro amparu de su volontariadu, paris cun sos progetos pro su benidore chi ant a interessare istitutziones e assòtzios de su territòriu.
«Su ruolu de su Csv in s’isvilupu e in sa crèschida de su volontariadu si realizat fintzas e mescamente pro mèdiu de sa sua territorialidade», at declaradu Lucia Coi, presidente de su Csv Sardegna, in sa cunferèntzia de imprenta. «S’ìsula nostra si cumponet de medas realidades locales, totus aunidas de sa matessi bellesa e cumplessidade, ma cun diferèntzias geogràficas, culturales e sotziales. Pro custu nos semus impinnados a garantire a cada territòriu unu puntu riferimentu, in ue sas organizatziones potzant tènnere sustennu e assistèntzia, cun sa punna de promòvere fintzas s’isvilupu locale».
Su sìndigu de Lanusè, Davide Burchi, at postu a notu s’importu de sa presèntzia de su Csv in sa tzitade ogiastrina: «Semus pregiados meda chi un’esperièntzia de calidade comente sa de su Csv Sardegna apat agatadu domo in Lanusè. Connosco de persone custa realidade, essende chi apo tentu giai ocasione de collaborare cun su Tzentru servìtzios pro su volontariadu. Creo chi rapresentet un’oportunidade manna de crèschida pro totus. Lanusè est una comunidade aberta chi de seguru at a tènnere profetu dae sa presèntzia de tzentru. Sos assòtzios locales sunt una parte de importu de sa comunidade nostra e nos donant satisfatziones mannas: sos chi nde faghent parte sunt totu persones chi dèdicant su bonu de su tempus issoro a sos àteros, contribuende a su megioru sotziale ».
Sa cunferèntzia de imprenta est istada sighida dae unu cursu de formatzione pro unos trinta rapresentantes de sos assòtzios ogiastrinos. S’addòbiu at tentu s’obietivu de favorire s’interessu de sos giòvanos in su mundu de su volontariadu. Custu eventu faghet parte de unu progetu promòvidu dae su Csv Sardegna, e est parte de sa programatzione pro promòvere su tzivismu e su volontariadu intre sos istudiantes sardos.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
