«In una populatzione impresonada de chèntinas de detenudos, in sos prus casos crìticos, petzi pagas deghinas de persones ant sa possibilidade de atzèdere a unu cursu de formatzione, ant sa possibilidade de èssere impignadas in intro de sa die e, mescamente, tenent un’oportunidade noa de torrare a leare in manos sa vida issoro e de torrare a èssere parte de sa sotziedade gràtzias a un’impiegu». Est su chi at naradu s’assessora regionale de su Traballu Desirè Manca in un’addòbiu organizadu cun sa garante regionale de sas persones privadas de sa libertade personale issoro Irene Testa.
Su cummentu suo pertocat su cuadru relativu a sa formatzione in sas galeras de Sardigna, In pare a Manca e a Testa finamentas sos garantes de sos istitutos penitentziàrios de totu sos territòrios de Sardigna. Su de su 19 de santandria, fatu in Casteddu, fiat unu primu addòbiu in contu de sas crititzidades relativas a sos ispàtzios pagu dèghidos, a sa mancàntzia de personale dipendente e fintzas de sos mèigos, pagos a beru.
«Non semus totus che pare – at annantu s’assessora – naschende cun sas matessi cunditziones de partèntzia. Semus seguros chi medas bortas sas atziones criminosas sunt ligadas de carchi manera a cuntestos sotziales chi unos cantos detenudos nde fiant parte dae semper, in ue povertade e suferèntzias sunt presas a sa criminalidade. Còmpitu de sas istitutziones est su de permìtere a chie nch’est in intro de àere sa possibilidade de fraigare su caminu suo pro nche torrare a sa sotziedade, de lassare una caminera iscurigosa pro nch’intrare a un’àndala de lughe. Pro cussu est chi apo chertu addobiare a sos garantes de sos detenudos pro unu cunfrontu profetosu. Gràtzias a su contributu pretziosu issoro podimus comintzare a bìdere, s’una in fatu de s’àtera, totu sas problemàticas chi impedint a su sistema de formatzione de funtzionare a regime fintzas in intro de sos istitutos penitentziàrios».
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
