“Donne vissute in Sardegna” est unu radiodramma chi movet dae s’òpera omònima de Maria Michela Deriu e chi, in intro de sa ressigna culturale “Fèmminas” promòvida de a su Comune de Casteddu, ant a trasmìtere sos de Unica Radio lunis su 25 de santandria a sas 10 de mangianu, a sas 2 de merie e a sas 9 de sero. Su progetu – leghimus in sa nota de annùntziu – «naschet pro tzelebrare sa fortza, sa resilièntzia e s’identidade de sas fèminas sardas contende istòrias chi ammesturant veridades, assimìgios e irrealidade in unu biàgiu chi tocat su coro de sa cultura isulana».
Su radiodramma, adatadu dae Roberta Ferrau, cheret dare boghe a sas figuras femminiles contadas in su libru chi rapresentant in forma simbòlica sa richesa de sa traditzione sarda e su valore istòricu suo. Cada personàgiu mustrat una particularidade de sa prus cumplessa cunditzione femminile evidentziende momentos de sa vida de cada die, batallas personales e legendas populares chi, paris, «pintant un’afriscu fundudu de s’identidade sarda».
«Sa punna de s’initziativa – sighimus a lèghere – est sa de torrare a iscobèrrere e a valorizare custas figuras femminiles, giughende·nche s’iscurtadore a un’esperièntzia a tretu de sensibilizare su pùblicu in contu de memòria istòrica». Sa produtzione tècnica «garantit una calidade sonora chi ischit conchistare s’iscurtadore leende·nche·lu a sas atmosferas ispantosas de cada istòria». Sa registratzione l’ant afidada a Priamo Meloni chi, in pare cun Carlo Pahler, at fintzas contivigiadu su montàgiu dende a su progetu unu ritmu narrativu dende valore a sas interpretatziones de sos atores.
“Donne vissute in Sardegna” rapresentat una tapa de importu pro s’avaloramentu de su patrimòniu culturale de Sardigna oferende a su pùblicu non s’oportunidade ebbia de iscurtare istòrias de passione, ma fintzas de torrare a iscobèrrere s’importu de sas fèminas in sa traditzione nostra.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
