Su 5 de nadale 2025 sa Manifattura Tabacchi at a acasagiare sa de bator editziones de su Prèmiu Ondras, s’initziativa promòvida dae su Crei ACLI Sardegna e sustentada dae Regione Sardigna e Fondazione di Sardegna, devènnida oramai unu de is puntos printzipales de riferimentu europeos pro s’amparu e sa valorizatzione de is limbas de minoria. Un’addòbiu chi aunit tzelebratzione culturale, riflessione antropològica e progetu polìticu, trasformende Casteddu in unu laboratòriu internatzionale in contu de polìticas linguìsticas.
Nàschidu in su 2022 comente evolutzione de un’àteru prèmiu dedicadu a sa poesia sarda, Ondras si fundat subra de s’idea chi sa defensa de is limbas non siat un’atu de memòria ebbia, ma un’investimentu pro su benidore. “Sa manifestatzione nostra ponet a su tzentru is ùrtimos de is limbas ùrtimas”, ammentat su presidente de sa cummissione, s’iscritore Giuseppe Corongiu, acostagiadu dae Maria Antonietta Piga e Nicolò Migheli. Su faeddu ondras, chi signìficat “reconnoschimentu”, devenit gasi unu sìmbulu: reconnòschere su valore de s’àteru, costoire is paràulas suas, atritzare is istòrias suas.
Ocannu s’eventu, ghiadu dae Lucia Cossu e Piersandro Pillonca, cun sa presentada de su presidente regionale de is ACLI, Mauro Carta, sighit in su surcu de sa traditzione: is nùmenes de is premiados abarrant segretos e s’ant a iscoviare isceti su 5 de mese de idas.
Ma Ondras no est unu prèmiu ebbia. Est unu progetu culturale e polìticu chi punnat a pònnere sa chistione linguìstica a su tzentru de s’agenda pùblica, fraighende retes e istrategias de comunicatzione capatzas de influire in sa pertzetzione de sa sotziedade sarda. Comente at naradu Mauro Carta, s’amparu de su sardu e de is àteras limbas minoritàrias europeas bolet “unidade de intentos, sena partziduras e polèmicas: sa limba primu de totu”.
S’acumpangiamentu musicale de s’eventu est contivigiadu dae Matteo Leone, artista tabarchinu ativu intre su Sulcis e s’Europa.
In is annos colados su prèmiu at avaloradu figuras de cabbale de su panorama internatzionale: su poeta catalanu Carles Duarte, sa linguista Antonella Sorace, Franco Siddi, primu giornalista giùghere su sardu in Rai, s’ativista bascu Castillo Suarez Garcia e istudiosos de su bilinguismu europeu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
