Giòbia coladu in Ulìana, sos sìndigos de Orthullè, Orgòsolo, Durgali e Ulìana, paris cun sos dirigentes de s’Agèntzia Forestas e de s’Assessoradu Regionale a s’Ambiente, ant firmadu un’acordu istòricu pro s’amparu e sa promotzione sustenìbile de su Supramonte: si tratat de unu passu importante meda pro sa valorizatzione de custu territòriu.
S’acòrdiu de programa, giai aprovadu in sos annos colados, immoe intrant in sa fase esecutiva gràtzias a s’addòbiu de Ulìana. Sos sìndigos Bastiano Congiu (Ulìana), Pasquale Mereu (Orgòsolo), Angela Testone (Durgali) e Ennio Arba (Orthullè) ant sutaliniadu s’importu de custu progetu pro una gestione intelligente e coordinada de su Supramonte.
Su progetu previdet unos cantos interventos pro sa tutela de flora e fàuna locales, una gestione unitària de sa rete tziclu-escursionìstica e unu còmpudu de sos flussos turìsticos pro garantire sa sustenibilidade de su logu. Unu puntu de fundamentu de s’acordu est sa creatzione de unu Màrchiu ùnicu pro su Supramonte, pro ore de promòvere un’oferta turìstica integrada e a avalorare sas cumpetèntzias locales.
S’initziativa, chi faghet parte de s’atuatzione de sas medidas prevìdidas dae su Pianu de Gestione de su SIC de su Supramonte Internu, punnat a afortiare sa seguridade in sas interatziones intre su turismu ativu e sas àteras fainas territoriales. Sa rete tziclu-escursionistica at a èssere gestida in manera coordinada pro ofèrrere un’esperièntzia ùnica, cunsentende a sos turistas de bisitare sos territòrios de sos bator comunos in unu percursu immersivu de prus dies.
Su contègiu de sos flussos turìsticos e sa regulamentatzione de sas intradas ant a èssere fundamentales pro preservare s’integridade de s’ambiente e garantire unu turismu prus de calidade. Forestas e sos bator comunos ant a traballare comente unu sugetu ùnicu in sa gestione de s’àrea naturale, sena sa creatzione de entes noos, ma cun unu coordinamentu garantidu dae s’Assessoradu a sa Defensa de s’Ambiente, chi at a frunire sos fundos netzessàrios a s’atuatzione de su pianu.
