Tres dies de cabudanni pro afestare su mare. O, pro la nàrrere cun su nùmene de sa manifestatzione, pro “A-mare Santa Lucia”. Su 6, su 7 e s’8 de su mese chi intrat – movende dae sa trìbide “ambiente, isport e mùsica” – su burgu marinu de Thiniscole amparadu dae sa turre aragonesa at a ospitare s’eventu de concruos de istiu chi dae annos lu caraterizat. S’editzione de ocannu, organizada dae s’assòtziu culturale de arte cumpartzida “Frammenti” (cun s’agiudu de s’amministratzione comunale, de s’Unione de sos Comunes de su Monte Arvu, de sa Riserva de Biosfera Unesco “Tepilora, rio Posada e Montalbo” e de sa Fondazione di Sardegna), punnat a fàghere pigare parte sa populatzione cun unas cantas atividades programmadas in sas tres dies.
Collegadas a su fèstival b’at duas initziativas: sa prima est “Verde resistente” cun totu sos tzitadinos (siant issos residentes, turistas o butegheris) invitados a ondrare sas ventanas e sas ghennas issoro mudende·las in giardinos cun prantas grassas o frores chi netzèssitant paga abba pro chi si potzat àere un’òasi resistente e cun impatu ambientale bassu. Sa segunda est “Stellare Session”, unu progetu de iscritura creativa cun sa partetzipatzione de musitzistas e produtores in intro de una residèntzia artìstica chi at a permìtere un’espressione lìbera sena vìnculu perunu. Nd’at a essire a campu una suite musicale movende dae sos paesàgios sonoros de su logu.
Sa manifestatzione comintzat su 6, chenàbura, a sas ses de sero cun sos càntigos populares sardos a incuru de s’assòtziu culturale “Santa Lucia di Siniscola”. Fatu fatu s’aperitivu de presentatzione nch’at a introduire sos presentes a su fèstival intreu. Sa prima die si serrat cun sa projetzione de su documentàriu “Watermark, l’acqua è il bene più prezioso”.
Sas atividades de s’in cras comintzant a mangianu. Dae sas 9.30 a sas 11.30 sa tzeramista Elena Catgiu at a ghiare unu cursu pro sos dischentes, mannos e minores, apassionados de brocas e de àteros manufatos de tzeràmica. Sa sessione laboratoriale est programmada in sos ispàtzios de su Tzentru de educatzione ambientale in tretos de sa pineta. Dae sas 10 a sa una e dae sas tres a sas ses de merie ant imbetzes a presentare unos cantos progetos de sustenibilidade de su Parcu natzionale de s’Asinara. Dae sas 10 a sas 19, in sas prajas, sos amantiosos de sos isport s’ant a pòdere ispassiare cun atividades de Yoga, Pilates, Kite Surf, Sup, Fitness, Trekking, Qi-Gong, Mountain Bike, Diving e fintzas cun una velegiada de cabudanni a incuru de su Tzìrculu nàuticu de La Caletta. Semper a merie b’at in programma unu laboratòriu e retzìclu (dae sas 17 a sas 20) e una sessione de iscurtu – passigiada sonora in pare cun s’àudio documentàriu “Cicàlia” a incuru de Valeria Muledda.
Semper su 7 b’ant a èssere tres cunferèntzias: una a sas 19.30 cun sas operadoras de su Ceas Manuela Mulargia e Maria Luisa Mason in contu de Riservas de Biosfera; una a sas 20.30 presentende su progetu “Sea strong life Asinara” cun Francesca Centrella e Chiara Maggi de s’Ispra; una a sas 21.30 faeddende de sas abbas de su Monte Arvu cun Francesco Murgia.
Ricu fintzas su programma de s’8 chi, in pare cun unas cantas atividades de su die in antis, proponet finamentas unu trekking dae su faru de Capu Cuminu finas a Santa Luchia cun aperitivu finale (dae sas 9 a sas 12), sa presentatzione de su libru “Turismo lento-In cammino tenendo per mano l’ombra” de Bachisio Bandinu e una giostra a pedales (a sas 18).
Duas sas cunferèntzias (una a sas 18.30 e s’àtera duas oras a pustis): sa prima pertocat sas dunas de Capu Cuminu cun sas operadoras de su Ceas; sa segunda, cun Leonardo Lutzoni, est in contu de s’àrea marina proteta de Tavolara Punta Coda Cavallo.
In fatu a sas premiatziones pro sas initziativas “Verde Resistente” e “Veleggiata di settembre” e a sa presentatzione de su branu musicale essidu a campu dae sas sessiones creativas de sa residèntzia artìstica, su palcu suta de sa turra at a serrare sa manifestatzione cun su cuntzertu (a sas 23) de Pierpaolo Vacca e de Dj Cris abertu dae sos dischentes de s’iscola tzìvica de mùsica MeA.
Partner de s’eventu, cun “A-mare Sapori Ribelli”, sunt totu sos tzilleris, sos ristorantes e sas butegas de Santa Luchia proponende unu cocktail o unu menù ispetziale a chilòmetru zeru dedicadu a su fèstival.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
