Est dae ses annos chi de Cristian Farris, su pastore e sabateri de Arroli, non si nd’at ischidu prus nudda, comente si nche dd’apat ingùrtidu sa terra, ma sa famìlia, segura chi siat galu biu, no at mai iscabudadu de ddu chircare.
Dd’aiat bidu s’ùrtima bia su 21 de mese de ladàmine de su 2019, in su tzilleri de sa bidda bia is 8 de merie. A is amigos ddia aiat naradu chi fiat andende a atèndere is pegos. Giughiat unu mallione a istrìscias nieddas e viola, pantalones de felludu nieddu e cosìngios de pedde. Portat duos tatuàgios nòdidos, sa lìtera “D” in petorras e sa reina de is iscacos in su bratzu mancu. A probe de cuile aiant agatadu sa bitzicleta, mentras su furgone dd’aiat atzapadu abrugiadu unas cantas oras a pustis in s’uru de unu caminu de sartu conca a Scalepranu. In intro ddoe teniat su telefoneddu e is documentos, ma de Cristian mancu ispera. Sa Procura de Casteddu aiat abertu unu fascìculu pro ochisura contra disconnòschidos, ma finas a oe no at essidu a campu nudda.
De su fatu nd’aiat faeddadu fintzas sa trasmissione televisiva “Chi l’ha visto?”, chi aiat torradu a cumpònnere is momentos a in antis de s’isparimentu. Fiat una die comente is àteras etotu. Cristian aiat bèndidu tres parigas de sabatas, balangende 700 èuros e fiat cuntentu e serenu.
Fintzas a su mere de su tzilleri ddi fiat partu chietu, sena perunu sinnu de pensamentu. Pagu a pustis de is 19:30, fiat essidu de su locale, narende chi depiat andare a chenare cun un’amigu “de foras”. Dae tando, sa mama Giulia Salis e su babbu Efisio non si sunt arresos e ant sighidu a chircare sa beridade faghende apellos e incaressende·si a chie si siat pro pòdere agatare su fìgiu. In su programma de Federica Sciarelli aiant sotadu a chi ischiat calicuna cosa de faeddare e de non tìmere.
Chimbe annos a pustis sa mama Giulia at fatu un’apellu nou semper in su programma “Chi l’ha visto?”: «Fìgiu meu no est mortu, est cuende·si ca tenet timoria. Ma est biu. Faghe·nos ischire comente ti podimus agiudare». Giulia, 56 annos, e su maridu Efisio sunt sighende a atèndere su bestiàmene de famìlia, cun s’agiudu de is fìgios Walter e Vanessa, chi sunt cumbintos chi su carrale issoro non aeret perunu problema.
S’abogadu Gianfranco Piscitelli, legale de sa famìlia e presidente de Penelope Sardegna, est sighende su casu dae su printzìpiu. «Si una persone mancat, una cosa est segura: no nde dd’ant leadu is alienos. Chie ischit s’abarrat a sa muda. Ma si calicunu bolet allegare mi podet mutire fintzas in forma anònima a su nùmeru 388.6311738 o mi podet fintzas iscrìere a s’indiritzu studio.piscitelli@tiscali.it. Non timedas». Piscitelli at sollitzitadu a tantis bias sa Procura de Casteddu de torrare a abèrrere is indàgines, presentende memòrias noas e partetzipende a trasmissiones televisivas e initziativas de sensibilizatzione.
Ma a ses annos de distàntzia, s’iscumparta de Cristian Farris abarrat un’arcanu irrisortu. Is chircas in is sartos a inghìriu de Arroli e de is biddas a presu no ant donadu mai èsitu bonu, Oe, comente a tando, sa famìlia annoat s’apellu suo: «Cristian, si podes, torra a domo. Semus isetende·ti».
