Dae su 28 freàrgiu a su 31 de trìulas 2026 sa “Passeggiata coperta” in su Bastione de Saint Remy acasàgiat “Tutankhamon. La tomba, il tesoro, la scoperta”, una mustra chi batit in Casteddu sas còpias ufitziales de sa tumba de su “faraone pipiu”, tzertificadas dae su Ministèriu de sas Antighidades Egitzianu.
Sos originales, oe cunservados in su Grand Egyptian Museum in sa tzitade de Giza non ddas faghent prus biagiare. Custas riprodutziones sunt duncas s’ùnicu modu pro bìdere in Casteddu sa mascara funerària, sos sarcòfagos, sos carros, sas istàtuas amparadoras e sos ogetos personales de su faraone naradu “Golden Boy”.
Su percursu de sa mustra ispiegat s’iscoberta fata in su 1922 dae Howard Carter, cun iscenografias, installatziones e realitade virtuale chi permitet de bìdere totu sa tumba. Non fartant setziones dedicadas a sa mummificazione, a s’istòria de sa famìlia reale de Tutankhamon e a sos mitos nàschidos a fùrriu de sa tumba sua, comente sa “maleditzione”. Una legenda narat chi si calicunu at a proare a furare dae sa tumba de Tutankhamon at a mòrrere opuru at a èssere sighidu dae sa mala sorte..
Patrotzinada dae su Comunu de Casteddu, organizada dae sa sotziedade cooperativa Semata, s’initziativa at a èssere acumpangiada cun cunferèntzias e addòbios sientìficos.
Sa mustra, pensada pro totus dae sas famìlias a sas iscolas a sos apassionados, at a ofèrrere bìsitas ghiadas in prus limbas, materiales didàticos e una setzione intregada a sos prus piticos. Sa butega “bookshop” at a propònnere unu seberu de ogetos e publicatziones a tema bènnidos dae s’Egitu.
Sa mustra si podet bisitare totu sas dies dae sas 10 de su mangianu finas a sas oto de su merie (ùrtima intrada a sas 19).
In su giassu in lìnia www.tutankhamoncagliari.it est possìbile castiare sos prètzios de sos billetes de intrada e otènnere informatziones e agiornamentos. In alternativa si podet iscrìere una lìtera a s’indiritzu de posta eletrònica info.beniculturalicagliari@gmail.com.
