Casteddu s’aprontat a tzelebrare Sa Die de sa Sardigna 2026 cun unu programa chi càstiat adde de is làcanas de s’Ìsula. In ocasione de sa festa istituida in su 1993 pro avalorare s’identidade istòrica, linguìstica e culturale de sa Sardigna, sa Regione Autònoma de sa Sardigna promovet duas dies de eventos intre mùsica e riflessione, aunidos suta su tìtulu “Isole Future”.
S’editzione de ocannu de sa Die tenet un’imprenta internatzionale, essende chi ruet in ocasione cun s’addòbiu generale de sa Cummissione Ìsulas de sa Cunferèntzia de sa Regiones Perifèricas e Marìtimas de Europa, in programa su 29 de abrile in Casteddu. In custu cuntestu, su progetu si proponet comente tretu de atopu intre identidades locales e culturas insulares de su mundu, intre traditzione e cuntemporaneidade.
Su momentu printzipale at a èssere su cuntzertu de su 28 de abrile in Pratza de su Càrmine, dae is oras 19. In su palcu s’ant a donare su càmbiu artistas de ìsulas diversas, protagonistas de esperièntzias musicales capatzas de atritzare raighinas e innovatzione. A abèrrere sa serada at a èssere s’addòbiu intre Arrogalla e su Cuncordu e Tenore de Orosei, in unu diàlogu tra eletrònica e càntigu polifònicu traditzionale, reconnotu dae s’Unesco comente patrimòniu immateriale de s’umanidade.
A sighire, s’esibitzione de Gavino Murgia Ensemble, ghiadu dae s’artista nugoresu capatzu de fùndere jazz, traditzione mediterrànea e influèntzias africanas. Su biàgiu musicale at a sighire cun is Pitxorines, impinnadas in sa riletura de su repertòriu populare baleàricu, e cun Maya Kamaty, una de is boghes prus interessantes de s’iscena de s’Otzèanu Indianu. Sa serada at a èssere presentada dae Ambra Pintore.
Paris cun sa mùsica, ispàtziu fintzas a sa riflessione. Su 30 de abrile, in sa Biddighedda de is Museos de Casteddu, s’at a tènnere sa cunferèntzia “Dalla Sarda rivoluzione all’Europa delle Isole: Storia, Cultura e Prospettive”, una die de istùdios intregada a su ruolu de is ìsulas in su mundu cuntemporàneu. Istudiosos e acadèmicos ant a allegare de limba e istòria, polìtica mediterrànea e insularidade.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
