A coranta annus de su disastru de Chernobyl, funt medas in Itàlia e in Europa is initziativas promòvias po arregordai una de is tragèdias prus mannas de s’istòria de oi e po arregordai sa solidariedadi manna chi ndi sighit apustis. In custu cuntestu, Le Cicogne di Chernobyl est un’òpera de importu dedicada a cussa pàgina de istòria e a su movimentu mannu de acollèntzia chi at tirau a mesu medas famìllias, assòtzius e territòrius.
Promòviu e prodùsiu de Cittadini del Mondo – Cinema per il Sociale, Le Cicogne di Chernobyl est unu docufilm de Karim Galici, fatu cun s’agiudu de Rai Teche e Rai Sardegna e cun s’agiudu de sa Fundatzioni de Sardìnnia. Su film contat non feti su drama de su 1986, ma puru s’arresposta umana ispantosa de s’Itàlia e s’Europa. Su Paisu nostu at arriciu prus de 700.000 pipius chi arribaìant de is logus cuntaminaus.
S’importu de s’òpera ddu cunfirmat puru su caminu in is festival chi at giai fatu, cun prèmius e arriconnoscimentus bìncius in manifestatzionis comenti su San Giò Verona Video Festival, su San Benedetto International Film Festival e su Festival Internazionale del Cinema “Dino De Laurentiis”, chentze iscaresci chi dd’ant scioberau in festival e rassignas de cìnema indipendenti in Londra, Toronto, Roma e in Kerala, in India.
In is diis de su de coranta anniversàriu, Le Cicogne di Chernobyl fait puru unu passu a innantis: sa pellìcula immoi s’agatat in sa prataforma MovieReading cun s’audiodescritzioni po is personas tzurpas e is sutatìtulus descritivus po is personas surdas.
Intra de is arriconnoscimentus prus sintzius nc’at su scioberu de s’Avib – Federatzioni Italiana de is Assòtzius de Volontariadu po is pipius, chi ponit impari in totu Itàlia medas de is assòtzius impinnaus in s’istòria in is programmas de acollèntzia po is pipius chi arribànt de is logus cuntaminaus. Sa promotzioni de su film aintru de unu cìrcuitu natzionali pròpriu de proietzionis dedicau a s’arregordu de Chernobyl rapresentat po custu unu sinnali de importu mannu. Intre de is tapas noas de su cìrcuitu nci funt puru Imola e Gènova.
Su caminu de su docufilm passat puru is làcanas natzionalis. Domìnigu 26 de abrili, a coranta annus giustus de su disastru de Chernobyl, su film dd’ant a proietai in Logroño, in Spànnia, mentris in sa cida de su curantésimu anniversàriu at a arribai puru in is tres cabulogus de is Paisus Bascus: Vitoria-Gasteiz, Donostia-San Sebastián e Bilbao. Prima ddu iant giai presentau puru in Madrid, Lugano e Vienna. Ant giai annuntziau àtras tapas internatzionalis, e intre de custas puru Tokyo e Buenos Aires.
A coranta annus de s’intzidenti nucleari, Le Cicogne di Chernobyl s’afirmat comenti unu de is riferimentus culturalis de cust’anniversàriu, capassu de ponni impari testimonia, arregordu e responsabilidadi de totus in Itàlia e in Europa. Un’importu ancora prus mannu si si pensat ca si tratat de un’òpera nàscia in Sardìnnia, atesu de is cìrcuitus mannus e promòvia de una realidadi pitica indipendenti, chi cun d’unu isfòrtzu mannu de produtzioni at donau vida a unu film chi oi est a su centru de is initziativas de arregordu in Itàlia e a foras.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
