Dae su 5 a su 7 de austu, is caminos e is pratzas de Seui si torrant a prenare cun is sonos de sa segunda editzione de Contaminazioni Musicali, su progetu promòvidu dae s’Assòtziu Culturale Banda Musicale Gioacchino Rossini. Un’initziativa chi punnat a fàghere de sa bidda a làcana tra Ogiastra e Barbàgia unu polu musicale istàbile, capatzu de atzocare giòvanos mùsicos de totu sa Sardigna e in prus, de fàghere de sa mùsica unu motore de crèschida culturale e territoriale.
Pro tres dies, Seui at a acasagiare unu programa ricu e eventos, cun seminàrios dedicados a sa formatzione musicale, pensados pro istudiantes de cada livellu. Ghiados dae professionistas afirmados – comente Dario Zara, Maurizio Floris, Martina Cirronis e Federico Fenu – is partetzipantes ant a tènnere sa possibilidade de si perfetzionare in istrumentos a sùlidu, percussione, càntigu, pianoforte, chiterra e mùsica corale, suta sa diretzione artìstica de su mastru Adriano Sarais. A banda de sa didàtica, cada sero is caminos de su tzentru istòricu s’ant a animare cun jam session abertas a pùblicu e musitzistas, in unu clima de cumpartzimentu autènticu.
Su nùmene Contaminazione Musicali ddoe est s’ànima de su progetu: s’addòbiu intre limguàgios, esperièntzias e generatziones, in unu diàlogu continu chi avalorat sa diversidade musicale comente oportunidade de iscàmbiu e arrichimentu.
Paris cun is fainas didàticas, s’eventu previdet fintzas unu programa turìsticu e culturale pro acumpangiadores e bisitadores, cun bìsitas ghiadas a su sistema de is museos seuesu, essidas in sa natura e laboratòrios de coghina de su logu. Un’ocasione pro iscobèrrere su territòriu e is traditziones suas in un’atmosfera pragerosa e cortesa.
Su progetu s’insertat in su surcu de unu percursu fraigadu in is annos dae s’Assòtziu Rossini, nàschidu in su 1922 e oe puntu de riferimentu pro sa formatzione musicale de su territòriu. Cun prus de chentu sòtzios e un’iscola de mùsica ativa a tot’annu, s’assòtziu at ischidu interessare fintzas is comunos lacanàrgios, dende vida in su 2019 a sa SeuinStreet Banda, truma de giòvanos sonadores chi espressat totu s’ispìritu inclusivu e dinàmicu de su progetu.
Contaminazioni Musicali est realizadu in collaboratzione cun collaboradores istitutzionales e musicales de balia– comente is Cunservatòrios de Casteddu e Tàtari, s’Assòtziu Kromatica, Singer Club, sa Regione Autònoma Sardigna e su Comunu de Seui – e est sustentadu fintzas dae amantiosos, famìlias e operadores culturales.
Sa partetzipatzione a sa manifestatzione, chi cumprendet peri su papare e s’allògiu, costat 150 èuros. Pro nde ischire de prus e pro s’iscrìere: contaminazionimusicaliseui@gmail.com o 34905555187.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
