Nch’est lòmpidu a Shangai su film “Mannoi” de Riccardo Santorsola e de Irene Coni. Nàschidu dae s’idea de unu “nebode” irgolesu, Luca Lai, est s’istòria de una traditzione tramandada e chi, in tempos de rellògios in totue, no est petzi un’inditu oràriu. Est s’istòria de sas tres càmpanas de sa crèsia parrochiale de Santu Nigola (sa manna, sa mesulana e sa minore) e de sos sonadores suos.
Su sèberu de su nùmene “Mannoi” no est de badas: Luca at imparadu dae su manneddu tziu Batore Piu, beru, ma in custu documentàriu de mannoi bi nd’at prus de unu. Tziu Zosepe Golonai, pro nàrrere, chi in su momentu de sas ripresas teniat setantasete annos, impareit a sonare gràtzias a tziu Ninnu Lai, chi tando nd’aiat otanta.
B’est fintzas tziu Jorji Froris, chi isse puru sonat dae cando fiat giaganeddu. E tziu Batore, chi impareit gioghende cun sos ferros, sas tàulas e sas funes de unu carritu in pare cun un’amigu: un’annestru profetosu pro nch’artziare prontu a pustis a campanile, mancari sena prodùere sonu perunu. Como tziu Batore non bi sonat prus, dae sa domìniga de Pasca de su 2023. Ma su sonu suo est ammentadu dae sa gente de sa bidda chi lu reconnoschiat, e chi isse etotu modulaiat cunforma a sa funtzione religiosa.
Su film, a pustis de l’àere projetadu in Irgoli su 4 de trìulas coladu, at partetzipadu a su cunvegnu biennale de s’Ictmd (International council for Traditions of Music and Dance) in Shanghai, ocannu dedicadu a sos documentàrios etnomusicològicos. E, semper in sa tzitade tzinesa, l’ant projetadu in su de bator China Musics Ethnographic Film Festival (CMEFF), su 18 de trìulas, ue l’ant retzidu cun totu sos onores e cun sa curiosidade de unu pùblicu asiàticu chi de sas càmpanas nde faghet un’impreu agigu diferente.
In prus chi dae sos sonos de sas càmpanas, su film – chi tenet su patrotzìniu de su Comune de Irgoli – est acumpangiadu dae sas mùsicas de Stefano Colombelli (contrabbassu), Carlo Pusceddu (percussiones) e Francesco Morittu (chiterra).
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
