De sos film chi ant presentadu in sa setzione “Scenari sardi” de su fèstival IsReal de su tzìnema documentàriu b’est finas “Ìsulas de s’ìsula” de su regista indipendente Lorenzo Sibiriu.
Giradu in sos ispigros acuàticos de s’artzipèlagu de su Sulcis, su documentàriu contat s’istòria de is piscadores artesanales de cussos tretos cun sa passione e sos problemas issoro.
B’at unas cantas testimonias chi nos agiudant a cumprèndere cale est su cuntestu e cales sunt sas maneras de sighire a fàghere su traballu issoro cun atza e resitèntzia.
B’est su contu de Samuele, unu pitzocu de 29 annos de Portescusi, chi non faeddat de unu traballu fàtzile: «Si essit a mangianile, tempus bonu o tempus malu, e su prus de sas bortas no ischis ti torras a domo cun sa giorronada».
B’est su de Mirko, 30 annos de Porto Pino, chi faeddat de sas «tècnicas de pisca chi podent fàghere dannu mannu a s’ambiente» e como s’interessat de biologia marina pròpiu pro ampare su mare.
B’est su de Stefano, 37 annos de Câdesédda, chi bogat a campu sas rialias chi is piscadores tenent pari-pari («est difìtzile a beru a l’agatare unu momentu de coesione») e de sa liberatzione chi est pro issu su de nch’essire a mare a tesu dae sa «vida normale» de cada die.
E b’est fintzas su de Cristina e Alessandro, duos lìgures de 50 annos, maridu e mugere, chi a pustis de àere postu pee in Santu Pedru pro ses annos in fèrias ant detzisu de serrare butega in Savona e de si nche bènnere a inoghe: «Nos amus comporadu una barca e dae tando non bi l’amus mai sessada de essire a piscare, semper paris».
“Ìsulas de s’ìsula” nch’intrat a su coro de sas contradditziones de unu setore chi in sos annos at pigadu corfos dae s’industrializatzione chìmica e dae sa pisca madura.
Su documentàriu l’ant fatu cun su contributu de sa Regione, su sustegnu de sa Società Umanitaria – Cineteca Sarda e s’agiudu de Italia Nostra Sardegna e de sa Società Operaia di Mutuo Soccorso de Igrèsias. Cheret fintzas mentovada sa campagna di regorta de fundos chi at interessadu gente meda dae totue colende·nche sos 4mìgia èuros.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
