A la podimus istudare una candela sena bi surbare subra? Comente diamus pòdere fàghere mòvere un’ogetu gràtzias a s’àera de unu palloncinu? Comente si diat pòdere comunicare cun duas tassas? Sos fògios de sos giornales los podimus impreare pro fraigare? E sos ispaghetis e sos marshmallow, bene andant pro progetare? Parent dimandas de pagu contu, ispontàneas, ma sunt cunsideros chi sos pitzinnos elàborant cun curiosidade manna. E sunt dimandas chi sunt sa base de su progetu “Lo scienziato in classe” de su Crs4 chi, ocannu, est lòmpidu a sa de bator editziones, sende chi est comintzadu in s’annu iscolàsticu 2022-23.
Custu progetu de divulgatzione, in su 2025-26, at interessadu 2.653 pitzinnos cursende 8.823 chilòmetros in totu s’ìsula. Pitzinnos chi non si sunt galu sapidos de su totu de comente si siat livellende conca a bassu sa dibata iscientìfica e de comente su sistema iscolàsticu, chi sunt comintzende a frecuentare, nche siat in intro de una crisi sena pretzedentes. Mescamente in Sardigna ue s’ispopulamentu est sa còntiga pro acorpamentos graes; ue fintzas ocannu b’amus àpidu su record negativu de istudiantes chi no los ant ammissos a sa maturidade.
Pro custu est chi, in custu iscenàriu chi meresset su protagonismu curiosu issoro, sa risposta non bi la diamus pòdere àere in su notzionismu ebbia. Sa mègius risposta bi l’amus cando s’iscièntzia aplicada intrat a sas àulas. Non pro fàghere de cada alunnu in un’ispetzialista, ma pro lis frunire a sas generatziones noas sas craes de letura de sa realidade, dende annestru a su pensamentu crìticu, a sa lògica e a sa curiosidade iscientìfica. Ca s’iscièntzia est a l’imparare faghende·la, dimandende e isperimentende in su campu.
Su progetu “Lo scienziato in classe” l’at ideadu e giutu a dae in antis Andrea Mameli, divulgadore de su Crs4, proponende un’assentu esperientziale pro s’aprendimentu de sas disciplinas Stem. Pro mèdiu de materiales de impreu comune, sos pitzinnos isperimentant deretu fenòmenos fìsicos e printzìpios de s’ingegneria formulende ipòtesis e averguende sos resurtados sighende unu mètodu iscientìficu.
Dae su 2022-23 a oe, a custu progetu, b’ant pigadu parte 16mìgia pitzinnos, dimustrende cantu siat de giudu a nche giùghere s’iscièntzia aplicada e sas disciplinas Stem in sas classes, comintzende dae sas de s’infàntzia. Semenende connoschèntzia, duncas. Pro dare unu tempus benidore a unu territòriu chi non podet abarrare in dae segus.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
