In s’allega in contu de limba sarda b’at duos capìtulos noos. Ma unu ebbia l’ant iscritu. S’àteru l’ant a fàghere luego.
Su primu est Sardudict, prataforma gratùita cun 490mìgia paràulas e barda partzidas in logudoresas, campidanesas, nugoresas, gadduresas e turritanas.
Un’òpera de giudu e chi si presentat comente una novidade ma chi torrat a propònnere s’ischema de su ditzionàriu nòdidu de Antoninu Rubattu cun tres variedades mannas de su sardu e sas duas articulatziones printzipales de su mundu linguìsticu sardu-corsu.
Su de Rubattu (chi in lìnia non b’est prus mancari carchi manu santa l’apat sarvadu in s’Internet Archive) tenet fintzas carchi boghe in casteddanesu (Cs) e isulanu madaleninu (Lm), ma s’ischema suo mai est mentovadu dae sos autores de Sardudict.
Ma si su lessicògrafu senneresu non cheret chircadu in bonu, sa Limba sarda comuna in malu paret chi emmo. In Sardidict leghimus chi «s’istèrrida in Lsc non faghet dannu a su sardu ebbia ma a sa cultura sarda in toto». S’istèrrida de ite? De unu ditzionàriu? Ma in Lsc galu non bi l’amus, petzi unu glossàriu isperimentale. E non b’at una paràula inventada.
Est craru però chi, reproduende s’ischema de Rubattu, Sardudict si nch’istèsiat dae su sardu.wiki de s’Acadèmia de su sardu. Custos, partzende sa limba in duos blocos ebbia, fortzant sa cunvergèntzia intre logudoresu e nugoresu, controighende·si: pensemus a sos partitzìpios cun terminatzione -adu postos in su grupu logudoresu-nugoresu cando chi pròpiù in Nùgoro (e àteros logos “logudoresos”) est -au (a sa campidanesa, diamus nàrrere a sa grussera).
E sunt pròpiu sos de s’Acadèmia chi, cun unu comunicadu (su primu de ocannu) ant artziadu una polèmica movende dae una litera de invitu de sa Regione sarda (imbiada a sos editores) pro s’istèrrida de su primu ditzionàriu in Lsc (un’investimentu de 160mìgia èuros).
Custas sunt sas acusas: «inventziones ortogràficas» e impositzione de una «fonètica ufitziale». Ma sa documentatzione (chi no ant mentovadu in su comunicadu) àteru narat: «Pro garantire – leghimus – sa rapresentatividade màssima de su sardu faeddau, su coordinadore iscientìficu at a individuare sas macro-variedades pro sas trascritziones Ipa multiplas e sos file àudio diferentes».
In su ditzionàriu b’ant a dèvere intrare duamìgia ischedas movende dae sa classificatzione de Tullio De Mauro, acollende variedades formales e geo–sinònimos in su lemma printzipale.
Peristantu diamus su benebènnidu a Sardudict e isetemus su tantu chi bi cheret pro valutare su traballu de sa Regione. Ma pro li fàghere unu servìtziu bonu a sa limba cheret chi nche pongiamus a banda sas omissiones, sas abètias ideològicas e sas fake news.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
