S’Universidadi de Casteddu at programau unu cursu nou de làurea magistrali in Tossicologia Ambientale e Forense (Taf) po s’annu acadèmicu 2026/2027, is ativitadis didàticas cumintzant su primu de ladàmini chi benit.
Comenti ispiegat sa cordinadora de su cursu, sa profesora Patrizia Zavattari (responsàbili de su Laboratòriu de Biologia Molecolari, Genòmica e Epigenòmica de su Dipartimentu de Scièntzias Biomedicas), su cursu nascit po respùndiri fintzas a esigèntzias de su territoriu sardu, caraterizau de situatzionis cumplicadas ligadas a sa dismissioni de situs mineràrius, industrialis e militaris.
Su cursu bolit donai connoscèntzias e capacidadis analìticas e interpretativas chi pertocant reatus, crìminis e disastrus ambientalis, donendi atentzioni a is aspetus penalis dedicaus a sa valutatzioni de s’arriscu po sa saludi de s’òmini.
Podint pigai parti a su cursu de làurea magistrali siat is laureaus de su cursu triennali in Scièntzias Tossicològicas e Controllu de Calidadi, siat chie benit de atras disciplinas, comenti: Biologia, Farmacèutica, Chìmica, Ecologia e Genètica; Botànica, Geologia, Antropologia e Arrisorsas Mineràrias; Tècnicos de laboratòriu e Medicina de su traballu; Giurisprudèntzia.
Intre de is àmbitus de traballu ddoe sunt laboratòrius, agentzias guvernativas, s’Agentzia de is Doganas e de is Monòpolios, entis impinnaus in su contrastu a su tràficu illècitu de àliga, in s’abusivismu edilìtziu, in is operatzionis de recùperu e in sa tutela de su patrimòniu naturalìsticu e de is àreas archeològicas, in paris a is repartus specialis de is fortzas de s’òrdini.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
