Istòrias e pessonàgios casteddàios contados dae s’atore Elio Turnu Arthemalle chi at a èssere acostagiadu dae àteros artistas e mùsicos. Cumentzat su 27 de austu a sas 19 in su bar Fico d’India in su Poetto sa segunda editzione de “Arrabiu – istòrias casteddàias” progetu promòvidu dae s’assòtziu culturale Rts – Radio televisione sarda cun su contributu de su Comunu de Casteddu.
Sa prima serada s’at a intitulare “Stamborradas casteddaias”. Sos testos iscritos dae su giornalista Antonello Deidda ant a èssere bortados e interpretados dae Elio Turnu Arthemalle (Teatro Impossìbile) chi at a èssere acumpangiadu dae sa fisarmonicista Ivana Busu.
“Arrabiu” posca at a fàghere tapa in sos bighinados de Santa Avendrace, Mulinu Becciu e Villanova cun s’obietivu de fàghere dialogare su bighinadu cun sos abitantes suos. Sas fainas ant a sighire finas a su mese de santandria in collaboratzione cun diversos partners: Teatro Impossibile, Associazione Babel, Areavisuale Film, Associazione Culturale Musicale “Ennio Porrino” di Elmas, Associazione Arvèschida, Terra de punt, Ejatv, Fico d’India, Roxy Bar, Balena e Centro di Quartiere MU.BE. S’intrada at a èssere semper de badas. Sa diretzione artìstica de su progetu est curada dae Paolo Carboni.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
