Unu percursu totu in betada de unos 25 chilòmetros, dae su coro de su monte ogiastrinu finas a is abbas cristallinas de su mare de Tortolì. Custa est s’esperièntzia bìvida sàbadu coladu, su 23 de austu, dae is partetzipantes a sa manifestatzione “Dae su Monte a sa Marina”, organizada dae su Grupu tziclìsticu Ajò in Sardegna Bike Experience ASD, in collaboratzione cun is isportellos linguìsticos de Lanusè, Irbonu, Loceri e Tortolì.
A is 8.30 de mangianu, dae in antis sa crèsia de sartu de Santu Còsomo de Lanusè, si sunt agatados una truma de tziclistas, intre issos ses pipios, ghiados dae s’istrutore Innocenzo “Enzo” Gallozza. Mòvidos a ora de is 9, ant afrontadu in mountain bike su caminu chi, in un’ora e mesu, ddos at fatos lòmpere dae su pranu de Santu Còsomo a s’arenile de Muscì: unu percursu de 25 chilòmetros, chi dae1000 metros de cuota calat a bellu a bellu finas a livellu de su mare. Sa truma de tziclistas at fatu tapa in Lanusè, in sa pratza de sa Catedrale, e in Loceri, in sa pratza de sa domo comunale.
A s’arribbu, unu meritadu bagnu in is abbas lìmpidas de sa marina e, a sighire, unu momentu de festa cun cosa de papare e de bufare in cumpangia de is pipios e de sos babbos issoro.
S’initziativa, in prus de s’aspetu isportivu e de recreu, at tentu fintzas una valèntzia culturale e linguìstica forte. Durante sa faina, difatis, is organizadores ant chistionadu in sardu cun is piseddos, promovende de custa manera s’impreu de su sardu veiculare, in lìnia cun is obietivos de sos isportellos linguìsticos, impinnados a favorire s’usu de sa limba mama in cuntestos fitianos e comunitàrios, in s’isport puru.
«Custu est su cumintzu ebbia», ispiegant is organizadores, annuntziende àteros eventos in programa: de “sa chirca de s’iscusòrgiu” in bitzicleta a essidas in bitzicleta intre is nuraghes, ocasiones in ue is pitzocos ant a pòdere fàghere isport a s’abertinu e in su matessi momentu iscobèrrere su patrimòniu archeològicu e culturale de s’Ogiastra.
Dae annos Gallozza, figura de riferimentu pro is giòvanos tziclistas locales, promovet sa passione pro sa bitzicleta, educhende is pitzocos a su respetu de sas règulas de su caminu, de s’ambiente e de su paisàgiu. «Sa bici – ammentat Enzo – est unu trastu de crèschida, de sotzializatzione e de amore pro su territòriu».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
