Ue sa mantza mediterrànea addòbiat is montes e is gùturos medievales chi contant sèculos de vida comunitària, naschet su Museu a Chelu Abertu Genius Loci Lodè, unu percursu pensadu pro torrare a iscobèrrere sa memòria e s’ànima bera de sa Baronia cun un’esperièntzia immersiva e sustenìbile. S’inauguratzione de su progetu est atatzada in manera ufitziale pro su 2 de mese de ladàmine 2025 a oras de is 17:30 in su Comunu de Lodè.
Su percursu cumprendet 24 logos de interessu: 13 in su tzentru istòricu e 11 fatu fatu de unu tratzadu montanu de unos 5 km. Murales, crèsias, funtanas, domos antigas: totu tapas de unu contu chi aunit istòria e paristòrias, traditziones e identidade.
Cada postòrgiu giughet unu cartellu cun còdighe QR chi permitit de atzèdere cun su telefoneddu a un’aplicatzione dedicada cun cuntènnidos àudiu, vìdeu e de testu in italianu, inglesu e lodeinu, cun sutatìtulos fintzas in Limba Sarda Comuna. S’itineràriu faghet a ddu fàghere totu paris, in un’ùnica esperièntzia, o a tapas puru, adatende·si a is ritmos e a is tempos de cada bisitadore.
A su servìtziu digitale s’imbucat dae unu puntu de intrada multimediale comunale (Access point), chi donat un’anteprima interativa de su biàgiu. Su progetu, promòvidu dae su Comunu de Lodè e finantziadu dae su GAL Nugoresu Baronia e de su FEASR, est parte de s’interventu “Integratzione e afortigamentu de sa rete de is itineràrios turìsticos temàticos”.
Pensadu dae su Ceas Montalbo de Lodè, coordinadu dae su regista multimediale Francesco Casu e realizadu dae HQ Mèdia srl, su percursu est su resurtadu de unu traballu cumpartzidu chi at interessadu s’Unione de is Comunos de su Montalbo, chircadores, tècnicos, assòtzios e comunidades locales.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
