Su progetu “Locos de Cultura” de s’Unione de sos Comunes de su Monte Arvu at retzidu una mentzione ispetziale in intro de su prèmiu “Buone Pratiche 2025” de sos Istados generales de sas Tzitades intelligentes chi ant fatu in Pàdua su 20 e su de 21 santugaine.
Su reconnoschimentu arribat cun sa de ses editziones de custu eventu annuale de su cunsòrtziu City Vision cun prus de milli partetzipantes intre amministradores e dirigentes pùblicos, rapresentantes de sas impresas, chircadores e innovadores dae cada regione de s’istadu italianu.
Su progetu culturale mentovadu est un’initziativa istratègica chi interessat sas noe biddas de s’Unione subralocale (Bitzi, Lodè, Lùvula, Onanie, Orune, Osidde, Pasada, Thiniscole e Torpè) unidos dae sa voluntade de avalorare sa limba sarda e su patrimòniu culturale locale pro mèdiu de istrumentos innovativos, inclusivos e sustenìbiles.
“Locos de Cultura” naschet gràtzias a su finantziamentu regionale parte de su bandu TuLiS (cunforma a sa lege 22 de su 2018) e aunit a sa traditzione linguìstica de su territòriu sas potentzialidades ofertas dae sa digitalizatzione cun interventos comunicativos cuncretos (brossuras, vìdeos e pannellos) chi trasformant sos logos de sa cultura in ispàtzios atzessìbiles, dinàmicos e intelligentes.
«Sa Commissione valutadora – leghimus in sa lìtera chi annùntziat sa mentzione de su progetu – at apretziadu in prenu su contenutu de su progetu ritenende·lu idòneu a su reconnoschimentu de pràtica bona de cumpartzire in intro de sa comunidade de amministratziones pùblicas e de impresas de City Vision».
Cun crèsias, sitos nuràgicos e funtanas sacras, su materiale multimediale de “Locos de Cultura”, chi contat un’editzione in su 2023 e una in su 2024, si podet abbaidare pro intreu dau su situ internet locosdecultura.it.
