Cando su cuntzetu de su progressu si fadeit logu in sas pàginas de s’istòria, una de sas allegas in contu de rapresentàntzia democràtica pertocaiat su mandadu imperativu. Pro sa Costitutzione frantzesa de su 1791 is rapresentantes elègidos in sos dipartimentos non deviant rapresentare cussu dipartimentu ebbia ma sa natzione intrea. Est sa matessi fòrmula chi règulat s’ordinamentu costitutzionale italianu e chi permitit (fintzas) sa possibilidade de mudare in libertade grupu parlamentare o consiliare. S’eletu non perdet sa cadrea ca nat chi rapresentat a totu cantos. Pro is comunardos de Parig (1871), chi imponiant cussu vìnculu, is eletos fiant revocàbiles in cale si siat momentu.
Como colemus·nche dae su cuntzetu de progressu a is Progressistas sardos. Est a nàrrere de su partidu chi fiat cun su campu largu, chi si nch’esseit dae su campu largu pro si nche ghetare a Renato Soru e chi a concruos lasseit sa coalitzione de mister Tiscali pro torrare a bachile (e a sa cadrea manna de sa tzitade de Casteddu). Como sos Progressistas cherent mudare s’assessore ca narant de no èssere prus rapresentados dae Gianfranco Satta, cun dèlega a s’agricoltura. Chi però est cussigeri eletu in cussu partidu. Sa rèvoca sua dae s’esecutivu diat chèrrere nàrrere fintzas unu càmbiu de grupu consiliare. Is progressistas diant colare a duos dae tres chi sunt. A bastant pro b’aere unu grupu? A bastant pedire unu logu in Giunta regionale?
Si oe bi fiat istadu su mandadu imperativu, is Progressistas aiant pòdidu revocare s’eletu issoro cuntestadu ponende·bi·nde unu fidele a sos inditos de su partidu. Ma is Progressistas sunt pro su progressu de su 1791 o pro su de su 1871? A Luciano Uras, su chi diant chèrrere in càmbiu de Satta, nche lu setzeint in su Senadu su 2013 cun SeL; ma su 2016 nch’intreit a su grupu mistu in cuntrastu cun sa diretzione de su partidu. Nemos li podeit revocare su mandadu. Ma cheret su rimpastu.
