Cumentzat dae su Queensland su biàgiu chi at a batire sa rassegna de Visioni Sarde in totu su mundu. Est de importu chi movat dae s’Austràlia una rassegna destinada a promòvere su giòvanu tzìnema sardu in totu sos continentes.
A pustis de vàrios annos sa rassegna est devènnida semper prus manna, ponende·si comente a un’eventu internatzionale e comente a una vetrina pro sos giòvanos sardos chi faghent tzìnema.
S’obietivu de batire su tzìnema sardu a foras de s’Itàlia agatat s’agiudu de sos tzìrculos sardos chi traballant comente tzentros de organizatzione e de difusione de sa Sardigna in su mundu.
Est custu su casu de su tzìrculu Queensland Sardinian Culturas Club presididu dae Fausto Zanda, chi rivestit fintzas sa càrriga de Consultore de s’emigratzione pro s’Assessoradu de su Traballu de sa Regione Autònoma de sa Sardigna in rapresentàntzia de sos tzìrculos sardos in Austràlia. Su tzìrculu est intituladu a Ulisse Usai, sindacalista e dirigente de sa Filef (Federatzione Italiana Traballadores Emigrantes e Famìlias) chi at dedicadu s’atividade polìtica sua a sos problemas de sos emigrados sardos.
Sas òperas tzinematogràficas seberadas e distribuidas dae sa Cineteca de Bologna e dae sa Fundatzione Sardegna Film Commission, finas si diferint in su limbàgiu espressivu e in sos intentos estèticos, resessent a tocare temas de caràtere universale.
Sas pellìculas sunt “12 Aprile” de Antonello Deidda, “Fradi miu” de Simone Contu, “La Venere di Milis” de Giorgia Puliga, “Mammaranca” de Francesco Piras, “Santamaria” de Andrea Deidda, “Without you” de Sergio Falchi, ‘Una splendida felicità’ de Simeone Latini.
