Sa Germania tzèlebrat a Grazia Deledda in su chentenàriu de su Prèmiu Nobel per la Literadura, printzipiende dae Francoforte in su Meno. Giòbia 26 de freàrgiu, su Tzìrculu culturale “Maria Carta” Rhein-Main Frankfurt, presididu dae Tiziana Deidda, nàschida in Casteddu ma fìgia de seuesos, at inchingiadu sa rassigna “Deledda 100”, unu tziclu de eventos intregados is chent’annos dae s’assignatzione de su Nobel a sa iscridora de Nùgoro.
In s’Àula Manna de sa Frankfurt University of Applied Sciences, a sa presèntzia de unu pùblicu mannu atentu e interessadu, ant intervènnidu Michele Santoriello, responsàbile de is Afares culturales e comunicatzione de su Consoladu Generale de Itàlia in Francoforte, Stefano Lavra, presidente de s’ISRE, Marzia Vacchelli, letora Maeci de s’Universität des Saarlandes; Renate Kuen, letora Maeci de sa Goethe-Universität Frankfurt; e Cinzia Marongiu, originaria de Àrthana, docente de Italianu e Ispagnolu, coordinadora de su Dipartimentu de Limbas Romanas in sa Frankfurt University, vitzepresidenta de s’Assòtziu culturale sardu “Maria Carta” e co-curadora de unu manuale subra Canne al vento.
Tra is entes patrocinantes fiat presente s’Istitutu Superiore Regionale Etnogràficu, rapresentadu dae su presidente Stefano Lavra, chi at allegadu de su significu fungudu de s’iniziativa:
«S’ISRE at rispostu cun praghere a s’invitu de sa professoressa Marongiu e de su Tzìrculu Culturale Sardo Maria Carta, essende chi s’initziativa torrat in totu cun sa chi est missione nostra: fraigare connessiones fortes intre su mundu universitàriu e is istitutziones — dae s’Universidade de Francoforte a su Consoladu de Itàlia — ma fintzas cun sa comunidade sarda in su disterru, chi chircamus de dda incroire in cada initziativa nostra in Itàlia e foras puru».
Lavra at ammentadu su percursu filològicu chi s’ISRE est dedichende a s’iscritora nugoresa, cun tapas in Nùgoro, Casteddu e Roma, in sa Biblioteca Tentrale Naztionale di Roma, primu de lòmpere a Germània. Una sèberu fatu non pro de badas: sa Germània est sa primu natzione europea chi at traduidu is òperas deleddianas: su libru Le tentazioni, difatis, est essidu in tedescu in su 1903, petzi bator annos a pustis de sa publicatzione italiana, mentras L’edera in su 1907, fintzas un’annu in antis de s’editzione italiana.
«Sa presèntzia de s’ISRE in Germània — at concludidu Lavra — tenet unu significadu mannu: su de mustrare a is sardos disterrados totu s’istima nostra, ma fintzas su de pònnere a notu su ruolu de sa Germània in s’ispàinu e in su reconnoschimentu de s’òpera de Deledda».
S’eventu inaugurale, a tìtulu “Quasi Grazia”, at propostu unu biàgiu literàriu e teatrale dedicadu a su Nobel sardu, cun una cunferèntzia, sa proietzione de s’ispetàculu “Quasi Grazia” de Marcello Fois cun Michela Murgia e sa leghidura de testos leados dae su romanzu Cosima. S’iniziativa at aunidu a pare istitutziones e assòtzios: su Consoladu Generale de Itàlia in Francoforte, sa Frankfurt University of Applied Sciences, su Tzirculu “Maria Carta”, s’Universität des Saarlandes, sa Goethe-Universität Frankfurt e s’ISRE.
Cinzia Marongiu at allegadu de su traballu organizativu chi ddoe est a palas de s’eventu:
«Custa initziativa at bòlidu tres meses de abrontu in collaboratzione cun sa Frankfurt University of Applied Sciences, inue traballu, cun su Consoladu — mestamente cun Michele Santoriello — e su Tzìrculu Sardu “Maria Carta de Francoforte, de su cale so vitze-presidenta. A su progetu posca si nche sunt aunidas is collegas Marzia Mattavelli e Renate Kuen. Amus traballadu paris pro tres meses, cun atopos in videocunferèntzia e in presèntzia. Sa presèntzia de su presidente de s’ISRE, Stefano Lavra a s’abertura de s’eventu nos at onoradu meda e est istadu unu contributu de vàllia gràtzias a is aprofondimentos chi nos at dadu in contu a is òperas de Grazia Deledda e a is publicatziones crìticas fatas dae s’Istitutu in ocasione de s’annu deleddianu».
Sa rassigna “Deledda 100” sighit cun àteras initziativas in totu su 2026, semper contivigiados dae Cinzia Marongiu e Michele Santoriello e organizados dae su Tzirculu sardu “Maria Carta”, su Consoladu e àteras universidades de sa regione Rhein-Main, cunfirmende su ruolu de sa cultura comente ponte intre Sardigna e Germània.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
